مجھے دیکھ ایک عذاب میں ، کبھی خواب میں
کبھی آتش سرِ خواب میں ، کبھی خواب میں
کوئی نخل جھومتا ہے نگاہ کے روبرو
کبھی انتظارِ سحاب میں ، کبھی خواب میں
کبھی باد و آتشِ تیز میں ہے مری نمو
کبھی خاک میں ، کبھی آب میں ، کبھی خواب میں
کوئی رنگ باغ کے اِس طرف ، کبھی اُس طرف
کوئی عکس شاخِ گلاب میں ، کبھی خواب میں
کہیں اپنی طرز بدل بدل کے بھی مِل ہمیں
کبھی آشنائی کے باب میں ، کبھی خواب میں
ہمیں پھر سے تازہ حقیقتوں کا سُراغ دے
کبھی پردہ ہاے حجاب میں ، کبھی خواب میں
( محمد خالد ؔ مرحوم ()

جواب دیں
تبصرہ کرنے سے پہلے آپ کا لاگ ان ہونا ضروری ہے۔