کلام ۔ پروفیسر ‘ ڈاکٹر ‘ علامہ محمد اقبال کتاب ۔ ا…

کلام ۔ پروفیسر ‘ ڈاکٹر ‘ علامہ محمد اقبال
کتاب ۔ ابتدائی کلام اقبال
بہ ترتیب مہ و سال
ڈاکٹر گیان چند
صفحہ ۔ ۲۵۰ ـ ۲۵۱

کشادہ دستِ کرم جب وہ بے نیاز کرے
نیازمند نہ کیوں عاجزی پہ ناز کرے

بٹھا کے عرش پہ رکھّا ہے تو نے اے واعظ !
خدا وہ کیا ہے جو بندوں سے احتراز کرے

اثر غضب کا ، دعائے قدح میں ہے ساقی
کوئی اسے بھی ذرا داخلِ نماز کرے

جواب ملتا ہے لوکاک ، ما ء فنا کا
کوئی جو عجز کے دامن کو یاں دراز کرے

پرانے کفر کو تازہ کروں یہ کہہ کہہ کر
مدینہ وہ ہے کہ کعبہ جدھر نماز کرے

مری نگاہ میں ، وہ رند ہی نہیں ساقی !
جو ہوشیاری و مستی میں امتیاز کرے

مُدام گوش بہ دل رہ ، یہ ساز ہے ایسا
جو ہو شکستہ تو پیدا نوائے راز کرے

کوئی یہ پوچھے کہ واعظ کا کیا بگڑتا ہے
جو بے عمل پہ بھی رحمت وہ بے نیاز کرے

شعاعِ نور کو تاریکیِ جہاں میں نہ ڈھونڈ
یہی ہے شمع ، اگر دل کو تو گداز کرے

نہیں ہے فرق محبّت میں اور غلامی میں
یہ عشق وہ ہے کہ محمود کو ایاز کرے

سخن میں سوز ، الہٰی ! کہاں سے آتا ہے
یہ چیز وہ ہے کہ پتھٌر کو گداز کرے

تمیز لالہ و گل سے ہے نالۂ بلبل
جہاں میں وا ، نہ کوئی چشمِ امتیاز کرے

غرورِ زہد نے سکھلا دیا ہے واعظ کو
کہ بندگانِ خدا پر زباں دراز کرے

ہوا ہو ایسی کہ ہندوستاں سے اے اقباؔل !
اُڑا کے مجھ کو غبارِ رہِ حجاز کرے

حاشیہ ۔ یہ غزل مخزن جون ۱۹۰۴ء میں شائع ہوئی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔””””””’