پیر • 5 اکتوبر 2026ء
📚 کتب خانہ ۱۴۸٬۸۹۴

مظفرحنفی کا یومِ پیدائش April 01, 1936 … کل جو …

مظفرحنفی کا یومِ پیدائش
April 01, 1936

…
کل جو دِیوار گِراتا ہُوا طوُفاں نِکلا
پائے وحشت کے لئے گھر میں بَیاباں نِکلا

جانے کِس غم سے منوّر ہے ہر اِک لَوحِ جَبِیں
درد ہی رشتۂ اوراقِ پریشاں نِکلا

سر جُھکایا تو کبھی پاؤں تراشے اپنے !
پھر بھی مقتل میں مِرا قد ہی نُمایاں نِکلا

جال ہر سمت رِوایَت نے بِچھا رکھّے تھے
بابِ اِنکار کھُلا، جادۂ اِمکاں نِکلا

ہم کہ محرُومیِ قِسمت کا گِلہ رکھتے تھے
جس کو نزدِیک سے دیکھا وہ پریشاں نِکلا

آج بستی میں ہر اِک شخص ہے آئینہ بَدست
ہر کوئی خود سے مُلاقات پہ حیراں نِکلا

اب کسے چاک کریں، کِس کے اُڑائیں پُرزے
ہر گریبان، مُظفر کا گریباں نِکلا
….
بُوند بھر حِدّت جو باقی دِل کی چِنگاری میں ہے
قطرہ قطرہ خُون کا، آندھی کی تیّاری میں ہے

رقصِ بِسمل کا تو مکّاری میں ہوتا ہے شُمار
آپ کا خنجر چلانا بھی طرح داری میں ہے

ریت کا ہر ذرّہ، میرا ہم سفر ہے دشت میں
جو بھی کانٹا ہے، مِرے چھالوں کی غم خواری میں ہے

بَج رہے ہیں سارے ہمسایوں کے گھر میں جَلترنگ
اور اِک سیلاب، میری چاردِیواری میں ہے

تم بھی کرسکتے ہو دِل پر چوٹ کھا کر تجربہ
اے مسِیحاؤ ! مجھے آرام بیماری میں ہے

کوئی بھی چلنے پہ آمادہ نظر آتا نہیں !
کارواں کا کارواں مصرُوف سالاری میں ہے

شعر کہتا ہے مظفّر، داد سے بیگانہ وار
پَھل میں وہ لذّت کہاں ہے جو شجر کاری میں ہے

….