پیر • 5 اکتوبر 2026ء
📚 کتب خانہ ۱۴۸٬۸۹۴

قیصر شمیم ساز سے میرے غلط نغموں کی امید نہ کر آگ …

قیصر شمیم
ساز سے میرے غلط نغموں کی امید نہ کر
آگ کی آگ ہے دل میں تو دھواں کیوں کر ہو
…..
میرا مذہب عشق کا مذہب جس میں کوئی تفریق نہیں
میرے حلقے میں آتے ہیں تلسیؔ بھی اور جامیؔ بھی
….
کسی منزل میں بھی حاصل نہ ہوا دل کو قرار
زندگی خواہش ناکام ہی کرتے گزری
…..
موسم عجیب رہتا ہے دل کے دیار کا
آگے ہیں لو کے جھونکے بھی ٹھنڈی ہوا کے بعد
…..

موسم تو بدلتے ہیں لیکن کیا گرم ہوا کیا سرد ہوا
اے دوست ہمارے آنگن میں رہتی ہے ہمیشہ زرد ہوا

سب اپنے شناسا چھوڑ گئے رستے میں ہمیں غیروں کی طرح
چہرے پہ ہمارے ڈال گئی لا کر یہ کہاں کی گرد ہوا

چھوٹے نہ کبھی پھولوں کا نگر کوشش تو یہی ہے اپنی مگر
اک روز اڑا لے جائے گی پتوں کی طرح بے درد ہوا

کیا بات ہوئی کیوں شہر جلا اب اس کے سوا کچھ یاد نہیں
اک فرد سراپا آگ ہوا پل بھر میں ہوا اک فرد ہوا

آئی ہے گھنے جنگل میں ابھی جو کھیل بھی چاہے کھیلے مگر
کل میرے ساتھ اڑائے گی پھر صحرا صحرا گرد ہوا

آنکھوں کی چمک موہوم ہوئی لو دیتے بدن افسردہ ہوئے
در آئی ہے قیصرؔ گھر میں مرے یہ کیسی رتوں کی سرد ہوا
….
شکستہ خواب کے ملبے میں ڈھونڈھتا کیا ہے
کھنڈر کھنڈر ہے یہاں دھول کے سوا کیا ہے

نظر کی دھند میں ہیں بھولی بسری تصویریں
پلٹ کے دیکھنے والے یہ دیکھنا کیا ہے

ابھی تو کاٹ رہی ہے ہر ایک سانس کی دھار
ازل جب آئے تو دیکھوں کہ انتہا کیا ہے

رہے گی دھوپ مرے سر پہ آخری دن تک
جواں ہے پیڑ مگر اس کا آسرا کیا ہے

تجھے پسند کہاں حال پوچھنا میرا
تری نگاہ میں لیکن سوال سا کیا ہے

دھواں نہیں نہ سہی آگ تو نظر آئے
یوں چپکے چپکے سلگنے سے فائدہ کیا ہے

اداس رات کی خاموشیوں میں اے قیصرؔ
قریب آتی ہوئی دور کی صدا کیا ہے
….
ایک پودا جو اگا ہے اسے پانی دینا

اپنے آنگن کو نئی رت کی کہانی دینا

تری آواز سے جب ٹوٹے مرے گھر کا سکوت

در و دیوار کو بھی سحر بیانی دینا

پونچھ لینا مری پلکوں سے لہو کی بوندیں

مری آنکھوں کو اگر منظر ثانی دینا

کشتیاں دینا مگر اذن سفر سے پہلے

ٹھہرے پانی کو بھی دریا کی روانی دینا

یوں جلوں میں کہ نہ شرمندہ رہوں سورج سے

اور کچھ اور مجھے سوختہ جانی دینا

ریت پر نقش کف پا نہیں رہنے پاتے

اہل صحرا کو کوئی اور نشانی دینا