فِراق گورکھپوُری
سزائے حُسن پَرستی بَجا، بَجا بھی نہیں
کہ جُرمِ عِشقِ بُتاں ہے بُرا، بُرا بھی نہیں
کِسی کو کیا نہ مِلا زندگی میں، وائے نصیب!
ہمارے ہاتھ بس اِک دِل رہا، رہا بھی نہیں
لِیے دِیے بھی ہیں ہم لوگ، کھوئے کھوئے بھی
کہ ہوشِ غم زدگاں ہے بَجا، بَجا بھی نہیں
ارے خُدا تو ،امیروں کا ہے خُدا واعظ!
جسے غریبوں کا کہیے خُدا، خُدا بھی نہیں
اُدھر، قدم بھی اُٹھانے دے بددماغیِ عِشق
ہم ایسوں پر دَرِ جنّت کُھلا، کُھلا بھی نہیں
نظر فریبئ تحرِیر لے اُڑی مجھ کو
سِرے سے نامۂ جاناں پڑھا، پڑھا بھی نہیں
تمام شوخئ رفتار، تیری راہ گُزر
قدم کا نقش، کچھ ایسا اُٹھا، اُٹھا بھی نہیں
وہ جیسے ہے ہی نہیں، اِس ادا سے سامنے ہے
اگر کہوں کہ وہ مجھ سے خفا، خفا بھی نہیں
ٹھہر گئے سرِ دُنیا ، تو بے جگہ ٹھہرے
چلو چلو ! کہ یہ ماتم سرا، سرا بھی بھی نہیں
ادا، ادا سے ادا ہو، تو ہم، ادا سمجھیں!
نہیں ادا در ادا، جو ادا، ادا بھی نہیں
ہم ، اُس کو دیکھ کر بھی آہ! کِس طرح دیکھیں
نظارۂ رُخِ جاناں ، ہُوا، ہُوا بھی نہیں
عجِیب دَور ہے یا رب! کہ خوش جمالوں کو
وَفا، وَفا بھی نہیں ہے، جفا، جفا بھی نہیں
بَھلا ہے کون، بُرا کون اِس زمانے میں!
بُرا، بُرابھی نہیں ہے، بَھلا، بَھلا بھی نہیں
یہ وقتِ صُبحِ چمن آنسوؤں کی دُنیا میں
سرشکِ خندۂ گُل میں چُھپا، چُھپا بھی نہیں
نِگاہِ ناز سے کیا سُن کے دِل اُداس ہُوا
اگر کہَیں کہ، کُچھ اُس نے کہا، کہا بھی نہیں
چمک اُس کی ، تب و تابِ حُسن و عِشق میں ہے
زمِیں کا درد، کُچھ اِتنا دَبا، دَبا بھی نہیں
زماں، مکاں کا یہ پردہ، حجابِ اکبر ہے!
ہزار بار ، یہ پردہ اُٹھا، اُٹھا بھی نہیں
تِری نِگاہ سے دُنیا کو اِک شکایت ہے
بَجا، بَجا، یہ شِکایت بَجا، بَجا بھی نہیں
بس اِک نِگاہ کی پرچھائیاں بَقا و فَنا
بَقا ، بَقا بھی نہیں ہے، فَنا، فَنا بھی نہیں
جِسے، مُعاملۂ حُسن و عِشق کہتے ہیں
ہزار بار ! یہ جھگڑا چُکا، چُکا بھی نہیں
وہ آنکھ کہتی ہے، ایسے کا کیا ٹھکانہ ہے!
فِراقؔ آدمی توہے بَھلا، بَھلا بھی نہیں
فِراق گورکھپُوری

جواب دیں
تبصرہ کرنے سے پہلے آپ کا لاگ ان ہونا ضروری ہے۔