فراقٓ گورکھپُوری کوئی پیغامِ محبّت لبِ اعجاز تو د…

فراقٓ گورکھپُوری

کوئی پیغامِ محبّت لبِ اعجاز تو دے
موت کی آنکھ بھی کُھل جائے گی آواز تو دے

مقصدِعشق ہم آہنگئِ جُزوکُل ہے
درد ہی درد سہی، دل بُوئے دمساز تو ہے

چشمِ مخمُور کے عُنوانِ نظر کُچھ تو کُھلیں
دلِ رنجُور، دھڑکنے کا کُچھ انداز تو دے

اِک ذرا، ہو نشۂ حُسن میں اندازِ خُمار
اِک جھلک عِشق کے انجام کی، آغاز تو دے

جو چُھپائے نہ چُھپے اور بتائے نہ بنے
دلِ عاشق کو ، اِن آنکھوں سے کوئی راز تو دے

مُنتظر اِتنی، کبھی تھی نہ فضائے آفاق
چھیڑنے ہی کو ہوں پُردرد غزل، ساز تو دے

ہم اسیرانِ قفس، آگ لگا سکتے ہیں
فُرصتِ نغمہ، کبھی حسرتِ پرواز تو دے

عِشق اِک بار مشیّت کو بدل سکتا ہے
عندیہ اپنا مگر کُچھ نگہِ ناز تو دے

قُرب و دِیدار تو معلوم کسی کا، پِھر بھی
کُچھ پتہ سا فلکِ تفرقہ پرداز تو دے

منزلیں گرد کے مانند اُڑی جاتی ہیں
ابلقِ دہر! کُچھ اندازِ تگ وتاز تو دے

کان سے کام فراقٓ آنکھوں کا لے لیتے ہیں
آج چُھپ کر کوئی آواز پر آواز تو دے

فِراق گورکھپُوری