( غیــر مطبــوعــہ )
اے کاش وہ تن پوشــی کو افلاک سے نکلے
جب روح مِری ‘خاک کی پوشاک سے نکلے
برسے جو سرِ شام کبھی ابرِ تخیُّـل
خوشبُو کی طرح تُو گلِ ادراک سے نکلے
ہے باعثِ تشــویشِ جہاں یہ بھی کہ صیّاد !
نخچیر مجھ ایسا ترے فتراک سے نکلے
جاتا ہے فغــاں کرتا ہُوا جھونکا ہَوا کا
ہو کر جو مِرے دامنِ صد چاک سے نکلے
کچھ خُون کی بُو سے ہُوا ظاہر مَیں عدو پر
زخموں کے نشاں کچھ, خس و خاشاک سے نکلے
اٹکا ہے کسی زلفِ گرہ گیر میں یوں دل
جھٹکے بھی اگر وہ تو نہ پیچاک سے نکلے
اے ارضِ وطن ! آج یوں آغوش میں لے لے
مر کر بھی نہ ذی شانؔ تری خاک سے نکلے
( ذی شــانؔ الٰہـی )

جواب دیں
تبصرہ کرنے سے پہلے آپ کا لاگ ان ہونا ضروری ہے۔