پیر • 5 اکتوبر 2026ء
📚 کتب خانہ ۱۴۸٬۸۹۴

( غیــر مطبـــوعــہ ) کسی کے ساتھ رہو’ دل میں ہو…

( غیــر مطبـــوعــہ )

کسی کے ساتھ رہو’ دل میں ہو مکیں کوئی اور
عذاب ایسا کسی روح پر نہیں’ کوئی اور

مَیں تجھ کو بانہوں میں بھر کر’ تجھی کو ڈھونڈتا ہوں
جہاں میں ہے کہیں مجھ ایسا بے یقیں کوئی اور

خبر تو تھی’ کوئی مجھ میں مِرے سِوا ہے’ مگر
نظر بھی آتا ہے اب تو کہیں کہیں’ کوئی اور

کوئی جو ایسا رسیلا سخُن بھی کرتا ہو
مِری نظر میں تو ایسا نہیں حَسیں کوئی اور

تجھی سے عشق حرارت کشید کرتا ہے
کہاں ہے تجھ سا بَھلا لمس_آتِشیں کوئی اور

سنبھال رکّھو تم اپنے یہ سب عذاب و ثواب
تمہارا اور ہے مذہب’ ہمارا دِیں کوئی اور

میں کچھ نہ کچھ تو بہُت نا درست کرتا ہوں
کہ ایک چُپ ہو ‘ تو ہوتا ہے نکتہ چیں کوئی اور

سبھی سے پوچھ چکا تو سمَجھ میں آئی یہ بات
کہ مجھ پہ کھولے گا یہ رَمز ِ آخِــریں کوئی اور

جو دیکھتا تھا ‘ اُسے رنگ کی سمجھ ہی نہ تھی
سُو ‘ زخم ڈھونڈ رہے ہیں تماش بیں کوئی اور

انیسؔ و غالبؔ و اقبالؔ ہیں پسند مجھے
یہ بات سچ ہے ‘ مگر’ میرؔ سا نہیں کوئی اور

خدا کرے کہ مِری آنکھ جب کُھلے’ عــرفــانؔ !
تو آسمان کوئی اور ہو’ زمیں کوئی اور

( عِـــرفـــان ؔ ســـتّار )