بنائیں گے نئی دنیا ہم اپنی تری دنیا میں اب رہنا ن…

بنائیں گے نئی دنیا ہم اپنی
تری دنیا میں اب رہنا نہیں ہے
…
شمس الرحمٰن فاروقی کا یومِ پیدائش
January 15, 1936

ڈاکٹر شمس الرحمن فاروقی، ۱۵؍جنوری۱۹۳۶ء کو پرتاب گڑھ یوپی (بھارت) میں پیدا ہوئے۔ الٰہ آباد یونیورسٹی سے ۱۹۵۳ء میں انگریزی میں ایم اے کیا۔علم وفضل کی قدیم روایت باپ اور ماں دونوں سے ورثے میں ملی۔ ذریعہ معاش کے لیے حکومت ہند میں طویل عرصے نوکری کی۔ یہ شاعر کے علاوہ افسانہ نگار ، نقاد اور محقق ہیں۔ رسالہ ’’شبِ خون‘‘ جو الہ آباد سے نکلتا رہا ، اس کے ایڈیٹر تھے۔ یہ دودرجن سے زائد کتابوں کے مصنف اور مؤلف ہیں۔
٢٥؍دسمبر ٢٠٢٠ء کو شمسؔ الرحمن فاروقی انتقال کر گئے۔

شمسؔ الرحمن فاروقی کے یوم وفات پر منتخب کلام
…
ان کا خیال ہر طرف ان کا جمال ہر طرف
حیرتِ جلوہ رو بہ رو دستِ سوال ہر طرف
مجھ سے شکستہ پا سے ہے شہر کی تیرے آبرو
چھوڑ گئے مرے قدم نقشِ کمال ہر طرف
ہم ہیں جواں بھی پیر بھی ہم ہیں عدم بھی زیست بھی
ہم ہیں اسیرِ حلقۂ قول محال ہر طرف
نغمہ گرا ہے بوند بوند پھر بھی اٹھی ہے کتنی گونج
اڑتی پھرے ہے ذہن میں گردِ خیال ہر طرف
قلبِ حیات و موت سے مل نہ سکا کوئی جواب
پھینکا کیے ہیں گرچہ ہم سنگ سوال ہر طرف
….
جو اترا پھر نہ ابھرا کہہ رہا ہے
یہ پانی مدتوں سے بہہ رہا ہے
مرے اندر ہوس کے پتھروں کو
کوئی دیوانہ کب سے سہہ رہا ہے
تکلف کے کئی پردے تھے پھر بھی
مرا تیرا سخن بے تہہ رہا ہے
کسی کے اعتماد جان و دل کا
محل درجہ بہ درجہ ڈھہ رہا ہے
گھروندے پر بدن کے پھولنا کیا
کرائے پر تو اس میں رہ رہا ہے
کبھی چپ تو کبھی محوِ فغاں دل
غرض اک گو مگو میں یہ رہا ہے