پیر • 5 اکتوبر 2026ء
📚 کتب خانہ ۱۴۸٬۸۹۴

ایک دفعہ کا ذکر ہے، ایک درخت تھا… اور ایک لڑکا تھا…

ایک دفعہ کا ذکر ہے، ایک درخت تھا…
اور ایک لڑکا تھا جو ہر روز اس کے پاس آیا کرتا تھا۔

لڑکا اس کی شاخوں پر چڑھتا، اس کے پتوں سے کھیلتا، اس کے سائے میں سو جاتا…
اور درخت ہر بار خوش ہو جاتا، جیسے اس کی زندگی کا مقصد پورا ہو گیا ہو۔

وقت گزرتا گیا…
لڑکا بڑا ہو گیا۔

اب وہ کھیلنے نہیں آتا تھا۔
ایک دن آیا اور بولا، “مجھے پیسے چاہیے، مجھے چیزیں خریدنی ہیں۔”

درخت نے کہا، “میرے پاس پیسے تو نہیں… مگر میرے سیب لے جاؤ، بیچ لینا۔”
لڑکے نے سارے سیب توڑ لیے… اور چلا گیا۔
درخت پھر بھی خوش تھا۔

کچھ عرصے بعد وہ پھر آیا…
“مجھے گھر بنانا ہے۔”

درخت نے کہا، “میری شاخیں کاٹ لو، ان سے گھر بنا لینا۔”
لڑکے نے شاخیں کاٹ لیں… اور چلا گیا۔
درخت پھر بھی خوش تھا… مگر اب وہ ادھورا سا ہو گیا تھا۔

پھر ایک دن لڑکا واپس آیا…
اب وہ جوان نہیں رہا تھا۔
اس نے کہا، “میں تھک گیا ہوں… مجھے کہیں دور جانا ہے، ایک کشتی چاہیے۔”

درخت نے آہستہ سے کہا،
“میرا تنا کاٹ لو… اس سے کشتی بنا لینا۔”

لڑکے نے تنا کاٹ لیا… اور چلا گیا۔
درخت اب صرف ایک ٹھونٹھ رہ گیا تھا…
مگر پھر بھی وہ خوش تھا۔

بہت سال گزر گئے…
ایک دن وہ لڑکا… اب بوڑھا ہو کر واپس آیا۔

درخت نے دھیمی آواز میں کہا،
“میرے پاس اب کچھ نہیں… نہ سیب، نہ شاخیں، نہ تنا… میں صرف ایک پرانا ٹھونٹھ ہوں۔”

بوڑھا آدمی مسکرایا،
“مجھے اب کچھ نہیں چاہیے… بس ایک جگہ چاہیے جہاں بیٹھ کر آرام کر سکوں۔ میں بہت تھک گیا ہوں۔”

درخت نے خود کو جتنا سیدھا کر سکتا تھا کیا…
اور کہا،
“آؤ… میرے اوپر بیٹھ جاؤ… آرام کرو۔”

وہ بیٹھ گیا۔

اور درخت… ایک بار پھر خوش ہو گیا۔ 🌿