اردو کے چند لفظ ہیں جب سے زبان پر تہذیب مہرباں …

اردو کے چند لفظ ہیں جب سے زبان پر
تہذیب مہرباں ہے مرے خاندان پر
….
اشوک ساحل کا یومِ وفات
24/اگست 2020
….
میں تمہیں اپنے اصولوں کی قسم دیتا ہوں
مجھ کو مذہب کے ترازو میں نہ تولا جائے
میں نے انسان ہی رہنے کی قسم کھائی ہے
مجھ کو ہندو یا مسلمان نہ سمجھا جائے
…
نظر نظر میں اترنا کمال ہوتا ہے
نفس نفس میں بکھرنا کمال ہوتا ہے
بلندیوں پہ پہنچنا کوئی کمال نہیں
بلندیوں پہ ٹھہرنا کمال ہوتا ہے
….
ضرورتیں میری غربت پہ طنز کرتی ہیں
مرے ضمیر تجھے مار دوں تو مر جاؤں
….
دل کی بستی میں اجالا ہی اجالا ہوتا
کاش تم نے بھی کسی درد کو پالا ہوتا
…
اب اس سے پہلے کہ دنیا سے میں گزر جاؤں
میں چاہتا ہوں کوئی نیک کام کر جاؤں
خدا کرے مرے کردار کو نظر نہ لگے
کسی سزا سے نہیں میں خطا سے ڈر جاؤں
ضرورتیں میری غیرت پہ طنز کرتی ہیں
مرے ضمیر تجھے مار دوں کہ مر جاؤں
بہت غرور ہے بچوں کو میری ہمت پر
میں سر جھکائے ہوئے کیسے آج گھر جاؤں
مرے عزیز جہاں مجھ سے مل نہ سکتے ہوں
تو کیوں نہ ایسی بلندی سے خود اتر جاؤں
….
میری طرح ذرا بھی تماشہ کیے بغیر
رو کر دکھاؤ آنکھ کو گیلا کیے بغیر
غیرت نے حسرتو کا گریباں پکڑ لیا
ہم لوٹ آئے عرض تمنا کیے بغیر
چہرہ ہزار بار بدل لیجیے مگر
ماضی تو چھوڑتا نہیں پیچھا کیے بغیر
کچھ دوستوں کے دل پہ تو چھریاں سی چل گئیں
کی اس نے مجھ سے بات جو پردہ کیے بغیر
………………