پیر • 5 اکتوبر 2026ء
📚 کتب خانہ ۱۴۸٬۸۹۴

رئیس امروہوی کی غزلیں — Rais Amrohvi Ghazals

رئیس امروہوی کی منتخب غزلیں اور نظمیں۔

خاموش زندگی جو بسر کر رہے ہیں ہم (غزل)

خاموش زندگی جو بسر کر رہے ہیں ہم

گہرے سمندروں میں سفر کر رہے ہیں ہم

صدیوں تک اہتمام شب ہجر میں رہے

صدیوں سے انتظار سحر کر رہے ہیں ہم

ذرے کے زخم دل پہ توجہ کئے بغیر

درمان درد شمس و قمر کر رہے ہیں ہم

ہر چند ناز حسن پہ غالب نہ آ سکے

کچھ اور معرکے ہیں جو سر کر رہے ہیں ہم

صبح ازل سے شام ابد تک ہے ایک دن

یہ دن تڑپ تڑپ کے بسر کر رہے ہیں ہم

کوئی پکارتا ہے ہر اک حادثے کے ساتھ

تخلیق کائنات دگر کر رہے ہیں ہم

اے عرصۂ طلب کے سبک سیر قافلو

ٹھہرو کہ نظم راہ گزر کر رہے ہیں ہم

لکھ لکھ کے اشک و خوں سے حکایات زندگی

آرائش کتاب بشر کر رہے ہیں ہم

تخمینۂ حوادث طوفاں کے ساتھ ساتھ

بطن صدف میں وزن گہر کر رہے ہیں ہم

ہم اپنی زندگی تو بسر کر چکے رئیسؔ

یہ کس کی زیست ہے جو بسر کر رہے ہیں ہم

دل سے یا گلستاں سے آتی ہے (غزل)

دل سے یا گلستاں سے آتی ہے

تیری خوشبو کہاں سے آتی ہے

کتنی مغرور ہے نسیم سحر

شاید اس آستاں سے آتی ہے

خود وہی میر کارواں تو نہیں

بوئے خوش کارواں سے آتی ہے

ان کے قاصد کا منتظر ہوں میں

اے اجل! تو کہاں سے آتی ہے

شکوہ کیسا کہ ہر بلا اے دوست!

جانتا ہوں جہاں سے آتی ہے

ہو چکیں آزمائشیں اتنی

شرم اب امتحاں سے آتی ہے

عین دیوانگی میں یاد آیا!

عقل عشق بتاں سے آتی ہے

تیری آواز گاہ گاہ اے دوست!

پردۂ ساز جاں سے آتی ہے

دل سے مت سرسری گزر کہ رئیسؔ

یہ زمیں آسماں سے آتی ہے

کیوں جان حزیں خطرہ موہوم سے نکلے (نظم)

کیوں جان حزیں خطرہ موہوم سے نکلے

کیوں نالۂ حسرت دل مغموم سے نکلے

آنسو نہ کسی دیدۂ مظلوم سے نکلے

کہہ دو کہ نہ شکوہ لب مغموم سے نکلے

اردو کا جنازہ ہے ذرا دھوم سے نکلے

اردو کا غم مرگ سبک بھی ہے گراں بھی

ہے شامل ارباب عزا شاہ جہاں بھی

مٹنے کو ہے اسلاف کی عظمت کا نشاں بھی

یہ میت غم‌ دہلی مرحوم سے نکلے

اے تاج محل نقش بہ دیوار ہو غم سے

اے قلعۂ شاہی یہ الم پوچھ نہ ہم سے

اے خاک اودھ فائدہ کیا شرح‌ ستم سے

تحریک یہ مصر‌ و عرب و روم سے نکلے

سایہ ہو جب اردو کے جنازے پہ ولیؔ کا

ہوں میر تقیؔ ساتھ تو ہم راہ ہوں سوداؔ

دفنائیں اسے مصحفیؔ و ناسخؔ و انشاؔ

یہ فال ہر اک دفتر منظوم سے نکلے

بد ذوق ہے احباب سے گو ذوقؔ ہیں رنجور

اردوئے معلیٰ کے نہ ماتم سے رہیں دور

تلقین سر قبر پڑھیں مومنؔ مغفور

فریاد دل غالبؔ مرحوم سے نکلے

ہے مرثیہ خواں قوم ہیں اردو کے بہت کم

کہہ دو کہ انیسؔ اس کا لکھیں مرثیۂ غم

جنت سے دبیرؔ آ کے پڑھیں نوحۂ ماتم

یہ چیخ اٹھے دل سے نہ حلقوم سے نکلے

اس لاش کو چپکے سے کوئی دفن نہ کر دے

پہلے کوئی سرسیدؔ اعظم کو خبر دے

وہ مرد خدا ہم میں نئی روح تو بھر دے

وہ روح کہ موجود نہ معدوم سے نکلے

اردو کے جنازے کی یہ سج دھج ہو نرالی

صف بستہ ہوں مرحومہ کے سب وارث و والی

آزادؔ و نذیرؔ و شررؔ و شبلیؔ و حالیؔ

فریاد یہ سب کے دل مغموم سے نکلے