اختر سعید کی منتخب غزلیں اور نظمیں۔
دل سے ارماں نکل رہے ہیں (غزل)
دل سے ارماں نکل رہے ہیں
میرے بھی دن بدل رہے ہیں
ورنہ گھر میں ہے گھپ اندھیرا
یادوں کے چراغ جل رہے ہیں
یہ عجب لوگ ہیں کہ ان کے
پاؤں نہیں پہ چل رہے ہیں
ہم در شاہ پر سوالی
آج ہیں اور نہ کل رہے ہیں
وہ ہی پہنچیں گے یار تک جو
گرتے گرتے سنبھل رہے ہیں
ہم نکو نام تو ہوئے پر
دل پہ آرے سے چل رہے ہیں
ان کو آزاد کر جو اب تک
زیر حبس علل رہے ہیں
ان کو محبوس کر جو کب سے
قاعدے سب کچل رہے ہیں
کہہ نہ کرب و بلا کا قصہ
لفظوں کے دل دہل رہے ہیں
عشق کا شور کریں کوئی طلب گار تو ہو (غزل)
عشق کا شور کریں کوئی طلب گار تو ہو
جنس بازار میں لے جائیں خریدار تو ہو
ہجر کے سوختہ جاں اور جلیں گے کتنے
طور پر بیٹھے ہیں کب سے ترا دیدار تو ہو
شدت درد دو پل کے لیے کم ہوتا کہ
غم کے الفاظ کے سنگار میں اظہار تو ہو
کب سے امید لگائے ہوئے بیٹھے ہیں ہم
نے سہی گر نہیں اقرار سو انکار تو ہو
کفر احرام کے پردے میں چھپا دیکھا ہے
ایک عالم ہے اگر درپئے زنار تو ہو
ہم نے مانا کہ شرافت ہے بڑی چیز مگر
کچھ زمانے کو شرافت سے سروکار تو ہو
خانۂ دل میں نہیں ایک کرن کا بھی گزر
ساری دنیا ہے اگر مطلع انوار تو ہو
رازداری ہی میں ہوتا ہے شریفوں کا حساب
تجھ کو منظور ہے گر بر سر بازار تو ہو