عبدالحکیم ذاکر کی منتخب غزلیں اور نظمیں۔
آئے بالیں پہ مرے عیسی دوراں ہو کر (غزل)
آئے بالیں پہ مرے عیسی دوراں ہو کر
کیوں مگر بیٹھ گئے سر بہ گریباں ہو کر
رونق بزم تو ہوں صورت پروانہ مگر
آزمائیں تو مجھے شمع فروزاں ہو کر
نہ تو جینے کا مزہ ہے نہ سکوں مرنے میں
زندگی رہ گئی اک خواب پریشاں ہو کر
ہم نفس پوچھ تو لے حال نشیمن بھی ذرا
برق صیاد کے گھر آئی گلستاں ہو کر
نہ رہی تاب نظر لطف تماشا معلوم
کیا کیا آپ کے جلوؤں نے پریشاں ہو کر
درد بھی تم نے دیا ہے تو دوا بھی تم دو
میرے پہلو میں رہو درد کا درماں ہو کر
بے بس اتنے ہوئے کیوں عشق بتاں میں ذاکرؔ
کفر بکنے لگے اک مرد مسلماں ہو کر
صنعت کردگار ہیں ہم لوگ (غزل)
صنعت کردگار ہیں ہم لوگ
عظمت شاہکار ہیں ہم لوگ
شوکت یادگار ہیں ہم لوگ
باعث افتخار ہیں ہم لوگ
صلح جو صلح کار ہیں ہم لوگ
گلستاں کی بہار ہیں ہم لوگ
جب سے سینہ فگار ہیں ہم لوگ
پیکر اضطرار ہیں ہم لوگ
دل پہ قابو نہ تم پہ قابو ہے
کتنے بے اختیار ہیں ہم لوگ
تیرے بھی ہو کے تیری دنیا میں
باعث ننگ و عار ہیں ہم لوگ
عشق کا کاروبار کرتے ہیں
برسر روزگار ہیں ہم لوگ
ہیں چمن میں گلوں کے ہمسائے
اور نگاہوں میں خار ہیں ہم لوگ
ہیں لگائے ہوئے گلے اب بھی
دوستی کا وقار ہیں ہم لوگ
کتنے وزنی ہیں پائے استدراک
دوش گیتی پہ بار ہیں ہم لوگ
جانتے ہیں وجوہ بغض و عناد
کیوں محبت شعار ہیں ہم لوگ
غم بچا کر دلوں میں رکھتے ہیں
کیا کفایت شعار ہیں ہم لوگ
بحر الفت کی تہ میں پاؤ گے
گوہر آب دار ہیں ہم لوگ
ذاکرؔ اردو زباں ہماری ہے
اس کے آموز گار ہیں ہم لوگ