یوم پیدائش ساحر ہوشیار پوری
10 فروری 1913
اصلی نام :رام پرکاش اوہری
…
کون کہتا ہے محبت کی زباں ہوتی ہے
یہ حقیقت تو نگاہوں سے بیاں ہوتی ہے
وہ نہ آئے تو ستاتی ہے خلش سی دل کو
وہ جو آئے تو خلش اور جواں ہوتی ہے
روح کو شاد کرے دل کو جو پر نور کرے
ہر نظارے میں یہ تنویر کہاں ہوتی ہے
ضبط سیلاب محبت کو کہاں تک روکے
دل میں جو بات ہو آنکھوں سے عیاں ہوتی ہے
زندگی ایک سلگتی سی چتا ہے ساحرؔ
شعلہ بنتی ہے نہ یہ بجھ کے دھواں ہوتی ہے
………………..
جب بگڑتے ہیں بات بات پہ وہ
وصل کے دن قریب ہوتے ہیں
……
ہم کو اغیار کا گلا کیا ہے
زخم کھائیں ہیں ہم نے یاروں سے
……
کون کہتا ہے محبت کی زباں ہوتی ہے
یہ حقیقت تو نگاہوں سے بیاں ہوتی ہے
……
تم نہ توبہ کرو جفاؤں سے
ہم وفاؤں سے توبہ کرتے ہیں
……
پھر کسی بے وفا کی یاد آئی
پھر کسی نے لیا وفا کا نام
…..
آخر تڑپ تڑپ کے یہ خاموش ہو گیا
دل کو سکون مل ہی گیا اضطراب میں
……
ہم قریب آ کر اور دور ہوئے
اپنے اپنے نصیب ہوتے ہیں
……
ہوئی تھی خواب میں خوشبو سی محسوس
تم آئے خواب کی تعبیر دیکھی
…..
وہ اور ہوں گے پی کے جو سرشار ہو گئے
ہر جام سے ہمیں تو نئی تشنگی ملی
……
اہل کشتی نے خود کشی کی تھی
ہوا بدنام ناخدا کا نام
……
اب تو احساس تمنا بھی نہیں
قافلہ دل کا لٹا ہو جیسے
…..
دل وہ صحرا ہے کہ جس میں رات دن
پھول کھلتے ہیں بہار آتی نہیں
……
اپنی اپنی ذات میں گم ہیں اہل دل بھی اہل نظر بھی
محفل میں دل کیوں کر بہلے محفل میں تنہائی بہت ہے
……………….
