ہنوز یاد ہے وہ رنگِ اضطراب ترا
بھرا تھا رنگ کے نغموں سے جب رباب ترا
عجیب دور تھا وہ دور بھی، جب او ظالم!
لباسِ عشق میں تھا حُسنِ لاجواب ترا
وہ تیری پہلی ملاقات کی رُوپہلی رات
اُدھر تھا چاند، اِدھر دیدۂ پُر آب ترا
کبھی خدا کی مشیّت پہ برہمی تیری
کبھی خود اپنی تمنّاؤں پر عتاب ترا
وہ ابتدائے محبّت کی تُند راتوں میں
بساطِ غم پہ مچلتا ہوا شباب ترا
وہ آنسوؤں کے دھندلکے میں چشمِ ناز تری
وہ کروٹوں کے طلاطم میں فرشِ خواب ترا
وہ تیری زلف کے خم سے مری پریشانی
وہ اپنی سانس کی خوشبو سے پیچ و تاب ترا
مُژہ کی طرحَ جھپکتا ہوا وہ میرا سوال
وہ دل کی طرحَ دھڑکتا ہوا جواب ترا
نہ پوچھ جوشؔ سے، کس درجہ تلخ و شیریں ہے؟
اُس التفات کے بعد، اب یہ اجتناب ترا
(جوشؔ ملیح آبادی)
انتخاب :-: ابوالحسن علی ندوی