ہر قدم پر نت نئے سانچے میں ڈھل جاتے ہیں لوگ حمایت …

ہر قدم پر نت نئے سانچے میں ڈھل جاتے ہیں لوگ
حمایت علی شاعرؔ

ہر قدم پر نت نئے سانچے میں ڈھل جاتے ہیں لوگ
دیکھتے ہی دیکھتے کتنے بدل جاتے ہیں لوگ

کس لیے کیجے کسی گم گشتہ جنت کی تلاش
جب کہ مٹی کے کھلونوں سے بہل جاتے ہیں لوگ

کتنے سادہ دل ہیں اب بھی سن کے آواز جرس
پیش و پس سے بے خبر گھر سے نکل جاتے ہیں لوگ

اپنے سائے سائے سرنہوڑائے آہستہ خرام
جانے کس منزل کی جانب آج کل جاتے ہیں لوگ

شمع کے مانند اہل انجمن سے بے نیاز
اکثر اپنی آگ میں چپ چاپ جل جاتے ہیں لوگ

شاعرؔ ان کی دوستی کا اب بھی دم بھرتے ہیں آپ
ٹھوکریں کھا کر تو سنتے ہیں سنبھل جاتے ہیں لوگ

https://www.youtube.com/watch?v=_2exs5TPsYQNoor Jehan Death Anniversary Month. Film: Mere Mehboob Year: 1966 MD: Khalil Ahmad Lyrics: Himayat Ali Shayar Enjoy crystal clear audio. Inaam Nadeem