پیر • 5 اکتوبر 2026ء
📚 کتب خانہ ۱۴۸٬۸۹۴

کچھ بھی نہیں رہا یہاں ، آپ سے کیا چھپائیے دل ہی می…

کچھ بھی نہیں رہا یہاں ، آپ سے کیا چھپائیے
دل ہی میں جب لہو نہیں ‘ شور کہاں مچائیے

دوری فریب ہے مگر ، دوری میں راستہ بھی ہے
بیٹھے رہیں گے کب تلک ، اب انہیں ڈھونڈ لائیے

سر میں جو گونجتی بھی ہے ، ہونٹوں پہ ڈولتی بھی ہے
کس کو ہے تابِ غم یہاں ، کس کو یہ دُھن سنائیے

سرحدِ شوق سے پرے ، شام کی بستیاں بھی ہیں
جب یہ سفر تمام ہو ، آگے کدھر کو جائیے

ڈھل گئی رات دیکھیے ، راہ رخِ امید کی !
اب ہمیں نیند آ گئی ، اب نہ ہمیں ستایئے

آنکھیں تھیں چاہتوں بھری ، چہرے جو مہربان تھے
اب وہ نظر نہ آئیں گے ، اب انہیں بھول جائیے

جان ہے۔۔ تو جہان ہے ، دل ہے ۔۔۔ تو آرزو بھی ہے
عشق بھی ہو رہے گا پھر ، جان ابھی بچائیے

کھو گئے خوابِ چشم و لب ، تابِ طلب نہیں رہی
دل میں وہ زور اب کہاں ، اب یہ دکاں بڑھائیے

( ابــرارؔ احـــمد )