کلام ۔ محسن نقوی
میں تیرے شہر سے گزرا تو ۔۔۔۔۔۔۔۔ !
میں تیرے شہر سے گزرا تو کچھ عجب سا لگا !
ہر ایک موڑ پہ ناکام حسرتوں کا ہجوم
ہر ایک راہ میں مقروض خواہشوں کی قطار
ہر اِک قدم پہ شکستہ ندامتوں کے مزار
ہر ایک آنکھ میں مرگِ تعلقات کا سوگ
ہر ایک روش پہ رواں جستجوےٓ رزق میں لوگ
تمام لوگ وہی لوگ تھے کہ جن سے کبھی
نظر چُرا کے گزرتا تھا میں ہَوا کی طرح
تمام ساےٓ میری آنکھ میں بکھرتے رہے
کِسی قریب کی بستی کے آشنا کی طرح
میں تیرے شہر سے گزرا تو کچھ عجب سا لگا
کہ جیسے شہر وہی ہے ، وہی نہی ہے مگر
کوئی گلی ، کوئی منظر ،کسی روش کا مزاج
جبینِ خاک میں پیوست ہیں فراق کے داغ
فضائے زرد کے ساۓ میں احتیاط کے ساتھ
اُجاڑ بام پہ جلتا ہوا ۔۔۔۔۔۔۔۔۔۔۔ اُداس چراغ
ہَوا سے پوچھ رہا تھا ۔۔۔۔۔ اِک اجنبی کی طرح
میرے سفر کا سبب ،تیرے ہمسفر کا سُراغ !
ہر اِک سوال مجھے کتنا بے سبب سا لگا
مَیں تیرے شہر سے گزرا تو کچھ عجب سا لگا
۔۔۔۔۔۔۔۔
کتاب ۔ طلُوعِ اشک
صفحہ ۔ ۱۸۹
بشکریہ ضیاء علی مغل

جواب دیں
تبصرہ کرنے سے پہلے آپ کا لاگ ان ہونا ضروری ہے۔