پیر • 5 اکتوبر 2026ء
📚 کتب خانہ ۱۴۸٬۸۹۴

کلام ۔ مجید امجد کتاب ۔ انتخاب مجید امجد مرتبہ ۔ س…

کلام ۔ مجید امجد
کتاب ۔ انتخاب مجید امجد
مرتبہ ۔ سَعَد اللہ شاہ
صفحہ ۔ 141
غزل نمبر ( ۱ )

گہرے سروں میں عرض نوائے حیات کر
سینے پہ ایک درد کی سل رکھ کے بات کر،

یہ دوریوں کا سیلِ رواں ، برگِ نامہ بھیج
یہ فاصلوں کے بندِ گراں ، کوئی بات کر،

تیرا دیار ، رات ، مری بانسری کی لے ،
اس خوابِ دل نشیں کو مری کائنات کر،

میرے غموں کو اپنے خیالوں میں بار دے،
اِن الجھنوں کو سلسلہٓ واقعات کر !

آ ، ایک دن ، مرے دلِ ویراں میں بیٹھ کر،
اِس دشت کے سکوتِ سخن جُو سے بات کر

امجؔد ، نشاط زیست اِسی کشمکش میں ہے
مرنے کا قصد ، جینے کا عزم ، ایک سات کر !

غزل نمبر ( ۲ )

اک عمر دل کی گھات سے تجھ پر نگاہ کی
تجھ پر ۔۔۔۔۔۔ تری نگاہ سے چھپ کر نگاہ کی

روحوں میں جلتی آگ ، خیالوں میں کھِلتے پھول
ساری صداقتیں کسی کافر نگاہ کی

جب بھی غمِ زمانہ سے آنکھیں ہوئی دو چار
منہ پھیر کر تبسمِ دل پر نگاہ کی !

باگیں کھنچیں ، مسافتیں کڑکیں ، فرس رکے
ماضی کی رتھ سے کس نے پلٹ کر نگاہ کی

دونوں کا ربط ہے تری موجِ خرام سے
لغزش خیال کی ہو کہ ٹھوکر نگاہ کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔””””