کلام ۔ قتیل شفائی
کتاب ۔ رنگ ۔ خُوشبُو ۔ روشنی
کُلّیات غزلیں ۔
آموختہ ۔ صفحہ نمبر 600
اب تو کسی محفل میں ساغر ہے نہ بادہ ہے
مدہوش مگر انساں پہلے سے زیادہ ہے
ناراض سے رہتے ہیں اب دیر و حرم مجھ سے
بول اے درِ جانانہ کیا تیرا ارادہ ہے
نفرت سے ہمیں دیکھے تُو جب بھی ملے واعظ
تیرے لیے رندوں کا دل پھر بھی کشادہ ہے
اب اصل بہاروں کی پہچان ہُوئی مشکل
پہنا ہُوا کانٹوں نے پھُولوں کا لبادہ ہے
کی ہو نہ کوئی سازش مِل جُل کے سواروں نے
بچ کر وہ رہے ان سے جو شخص پیادہ ہے
تھا نام سفر جس کا وہ چیز ہُوئی عنقا
راہی ہے نہ راہبر ہے منزل ہے نہ جادہ ہے
لکھتا ہے قتیلؔ ایسی غزلیں کہ سُنے جاوٓ
اشعار بھی اچھے ہیں انداز بھی سادہ ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔”””””

جواب دیں
تبصرہ کرنے سے پہلے آپ کا لاگ ان ہونا ضروری ہے۔