پیر • 5 اکتوبر 2026ء
📚 کتب خانہ ۱۴۸٬۸۹۴

کلام ۔ سید اکبر حُسین الہٰ آبادی کتاب ۔ کلیاتِ اکب…

کلام ۔ سید اکبر حُسین الہٰ آبادی
کتاب ۔ کلیاتِ اکبر
حصہ دوم ۔ صفحہ ۲۹۲

جن کے جلوے نہ سما سکتے تھے ایوانوں میں
ان کی خاک آج پڑی پھرتی ہے ویرانوں میں

کان نے ہوش کو اُلجھایا ہے افسانوں میں
آنکھ نے دل کو پھنسا رکھا ہے ارمانوں میں

مسجدیں چھوڑ کے جا بیٹھے ہیں میخانوں میں
واہ کیا جوش ترقی ہے مسلمانوں میں

شیخ جی آپ کو اللہ سلامت رکھے
آپ کا دم بھی غنیمت ہے مسلمانوں میں

نام اللہ و رسول اب تو میں سنتا ہوں کم
پہلے رائج تھے یہ الفاظ مسلمانوں میں

پڑھ کے منصور کی حالت مجھے وجد آتا ہے
خوب مضمون ہیں اللہ کے دیوانوں میں

گرمی دل جو ہے منظور تو منطق پہ نہ جا
عشق ہے آگ لگانے کے لیے جانوں میں

جس نے رکھا نہ فضولی سے سروکار اکبرؔ
مرد عاقل ہے وہی دہر کے مہمانوں میں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔””””””’