وہ جذبے چھین لو مجھ سے
.
جو میرے انگ ، میری روح ، میرے دل میں بستے ہیں
جنہیں خود میں سمونے کے لیے سینے ترستے ہیں
وہ لمحے چھین لو مجھ سے ۔ ۔ ۔
جو میرے ذہن کی تاریکیوں میں شمع روشن ہے
میری خلوت کی خوشبو ہے ، میرے یادوں کے گلشن ہیں
وہ چہرے چھین لو مجھ سے ۔ ۔ ۔
جو خال و خد نہیں آئینے ہیں میرے سیرت کے
جو ہر پہلو سے عکسِ ضوفشاں ہیں میری صورت کے
وہ رشتے چھین لو مجھ سے ۔ ۔ ۔
جو میرے ذہن و دل میں روشنی کی بیج بوتے ہیں
جو رگ رگ میں لہو کی چاپ سے منسوب ہوتے ہیں
وہ آنکھیں چھین لو مجھ سے ۔ ۔ ۔
جو میری روح کا نوحہ ہیں ، میری ذات کا لہجہ
جہاں ڈھلتا ہے آئینوں میں احساسات کا لہجہ
وہ سپنے چھین لو مجھ سے ۔ ۔ ۔
جو ان ویران آنکھوں میں ابھی تک جگمگاتے ہیں
ابھی تک سانس لیتے ہیں ، ابھی تک مسکراتے ہیں
وہ سپنے چھین لو مجھ سے ۔ ۔ ۔
مگر اے ظالمو! مجھ سے میرا احساس مت چھینو
طلب کی آس مت چھینو
جو میرے ضبط کی پہچان ہے وہ پیاس مت چھینو
میرا احساس مت چھینو
اعتبار ساجد

جواب دیں
تبصرہ کرنے سے پہلے آپ کا لاگ ان ہونا ضروری ہے۔