لب تیرے , لعلِ ناب ھیں دونوں
پر تمامئ عتاب ھیں دونوں
رونا آنکھوں کا رویئے کب تک ؟؟
پُھوٹنے ھی کے باب ھیں دونوں
ھے تکلف نقاب وے رُخسار
کیا چُھپیں ، آفتاب ھیں دونوں ؟؟
تَن کے معمُورے میں یہی دل و چشم
گھر تھے دو، سو خراب ھیں دونوں
کچھ نہ پُوچھو ، کہ آتشِ غم سے
جگر و دل کباب ھیں دونوں
سو جگہ اُس کی آنکھیں پڑتی ھیں
جیسے مَستِ شراب ھیں دونوں
پاؤں میں وہ نشہ طلب کا نہیں
اب تو سَرمَستِ خواب ھیں دونوں
ایک سب آگ ، ایک سب پانی
دیدہ و دل عذاب ھیں دونوں
بحث کاھے کو لعل و مرجاں سے
اُس کے لب ھی جواب ھیں دونوں
آگے دریا تھے دیدۂ تر ، میرؔ
اب جو دیکھو سَراب ھیں دونوں
”میر تقی میرؔ“
بشکریہ
https://www.facebook.com/Inside.the.coffee.house
جواب دیں
تبصرہ کرنے سے پہلے آپ کا لاگ ان ہونا ضروری ہے۔