پیر • 5 اکتوبر 2026ء
📚 کتب خانہ ۱۴۸٬۸۹۴

قامتِ دلربا پر شباب آ گیا یا سوانیزے پر افتاب…

قامتِ دلربا پر شباب آ گیا
یا سوانیزے پر افتاب آ گیا

جاگی جاگی ان آنکھوں کا عالم نہ پوچھ
سامنے ایک جامِ شراب آ گیا

اک نگاہِ محبت کی تخمیر میں
سب سمٹ کر جہانِ خراب آ گیا

یہ چلے،وہ بڑھے،وہ جواں ہو گئے
چند لمحوں میں یوم الحساب آ گیا

جھوم اٹھی ایک ارماں بھری زندگی
جب ہوائیں چلیں جب سحاب آ گیا

آیئے آئیے اس طرف وہ نشور
شاعرِ یادگارِ شباب آ گیا

(نشور واحدی)

المرسل :-: ابوالحسن علی ندوی(بھٹکلی)