پیر • 5 اکتوبر 2026ء
📚 کتب خانہ ۱۴۸٬۸۹۴

فراقٓ گورکھپُوری رُکی رُکی سی شبِ مرگ ختم پر آئی…

فراقٓ گورکھپُوری

رُکی رُکی سی شبِ مرگ ختم پر آئی
وہ پَو پھٹی، وہ نئی زندگی نظر آئی

یہ موڑ وہ ہے کہ پرچھائیاں بھی ساتھ نہ دیں
مسافروں سے کہو اُس کی رہ گزر آئی

اگرچہ راہ تھی صُبحِ بہار سی، لیکن
پہنچ کے منزِلِ جاناں پہ آنکھ بھر آئی

کہیں زمان و مکاں میں ہے نام کو بھی سکوں
مگر یہ بات محبت کی بات پر آئی

کسی کی بزم میں طربِ حیات بٹتی تھی
اُمِیدواروں میں کل موت بھی نظر آئی

کہاں ہر ایک سے اِنسانیت کا بار اُٹھا
کہ یہ بلا بھی تِرے عاشقوں کے سر آئی

پھر آج دِل میں تِری یاد مُدّتوں کے بعد
بہ چہرۂ متبسّم،بہ چشمِ تر آئی

نیا نہیں ہے مُجھےمرگِ ناگہاں کا پیام!
ہزار رنگ سے ،اپنی مُجھے خبر آئی

فضا کو جیسے کوئی راگ چھیڑتا جائے
تِری نِگاہ یُونہی دِل میں ہے اُتر آئی

ذرا وصال کے بعد آئینہ تو دیکھ،اے دوست!
تِرے جمال کی دوشیزگی نکھر آئی

تِرا ہی عکس سر اشکِ غمِ زمانہ تھا
نِگاہ میں، تِری تصوِیر سی اُتر آئی

عجب نہیں کہ چمن، در چمن بنے ہر پُھول
کلی کلی کی صبا جاکے گود بھر آئی

شَبِ فِراق اُٹھے دِل میں اور بھی کُچھ درد
کہوں یہ کیسے تِری یاد رات بھر آئی

فِراقٓ گورکھپُوری