( غیــر مطبــوعــہ ) میسّر گر نہیں حوریں ‘ میاں ! کیا چل رہا ہے بہشت۔ خاک میں’…

( غیــر مطبــوعــہ )

میسّر گر نہیں حوریں ‘ میاں ! کیا چل رہا ہے
بہشت۔ خاک میں’ اے رفتگاں !! کیا چل رہا ہے

چلا کر گولیاں مجھ پر ۔۔۔۔ پرندوں کو بتاؤ
جہاں پنجرے نہیں بنتے’ وہاں کیا چل رہا ہے

پرانے دُکھ ۔۔۔۔ نئے کپڑے پہَن کر آ گئے ہیں
یہ اپنے شہر میں آزُردہ گاں !! کیا چل رہا ہے

ہمارا بھوک نے منہ بھر دیا ہے گالیوں سے
تمہارے بد نصیبوں کے یہاں ‘ کیا چل رہا ہے

ندامت سے میں اپنا منہ چھپاتا پھر رہا ہوں
یہ میرے دوستوں کے درمیاں ۔۔۔۔ کیا چل رہا ہے

یہاں ہر رُوز ہونٹوں کے گِنے جاتے ہیں ٹانکے
تمہارے شہر میں شعلہ بیاں ! کیا چل رہا ہے

میں اُن کو چار دیواری سے باہَر پھینک دیتا
خبر ہوتی اگر کمروں کے ہاں ۔۔۔ کیا چل رہا ہے

لحَــد کے باسیوں کو عِلم ہوتا ہے کہ اُن کی
لحَــد پر بے نشانی یا نشاں ۔۔۔ کیا چل رہا ہے

ہمارے رہ بَروں کو جان کے لالے پڑے ہیں
تمہارے رہ بَروں میں گم رَہاں !! کیا چل رہا ہے

تو پھر قابو کِیا ہے ہجر کس جادو سے تم نے
اداسی گر نہیں افسُـــردہ گاں !! کیا چل رہا ہے

کبــیـرؔ ! اب خرچ کرتا ہوں میں اک چہرے پہ آنکھیں
سو ۔۔۔ اندازہ نہیں مجھ کو ‘ کہا ں کیا چل رہا ہے

( کبــیـرؔ اطہَـــر )