( غیــر مطبــوعــہ ) مِری خامُشــی مِرا تیر ہے ‘ …

( غیــر مطبــوعــہ )

مِری خامُشــی مِرا تیر ہے ‘ مِری عـاجِــزی مِری ڈھال ہے
مجھے اہل ِ عشــق کی بزم میں ‘ کرے زیر ۔۔ کس کی مجــال ہے

کبھی ہِجــر باعث ِ لُطفــــ ہے ‘ کبھی بار رنگ ِ وِصال ہے
یہ عجیب حالت ِ عشق ہے ‘ یہ غریب صُـورت ِ حــال ہے

ہے تِری عطا کا یقیں ہمیں ‘ سو ۔۔ ٹَلیں گے لے کے سخُن وَری
یہ کسی کا دست ِ دعا نہیں ‘ یہ ہمارا دست ِ ســـوال ہے

ہے عجب عمارت ِ زندگی ‘ ذرا غور سے اِسے دیکھیے
جہاں ایک خِشت ِ عــرُوج ہے ‘ وہیں ایک سنگ ِ زوال ہے

ہیں بَہ ظاہِر اپنی زمین پر ‘ مگر آسمان کی ہے خبر
لئے پھر رہی ہے کہاں کہاں ‘ یہ جو شـاہ راہ ِ خیــال ہے

یہ جو دل زدوں کی ہیں مجلِسیں ‘ ہے عجیب طرح کی خُو اِنھیں
کبھی خــار ۔۔۔ وَجہہ ِ نشــاط ہے ‘ کبھی پُھــول ۔۔ وَجہہ ِ ملال ہے

مِرے عَجــز کا ۔۔ تِرے کِبــر کا ‘ کِیا جائے کیسے موازنہ
مِرے پاس حُــرمت ِ حرف ہے ‘ تِرے پاس مسند و مال ہے

کوئی لحن یاں نہیں چل سکا ‘ کوئی صَــوت یاں نہیں جَچ سکی
کہ فَضــاے طیبہ میں آج بھی ‘ اثَـر ِ اذان ِ بلال ہے

( محمّــــــد مخـــتارؔ عـلـی )