( غیــر مطبــوعــہ )
زباں بندی سے پہلے کچھ انوکھے حادثے بھی ہیں
وفائیں سَـر نگوں ٹھہریں ، جفا میں ولولے بھی ہیں
عجب سی دوستی اور دشمنی کا اک قصیدہ ہے
دلوں میں کچھ قصیدے ہیں ، زباں پر رَزمیے بھی ہیں
ابھی الجھی ہوئی دانش ہے اپنی خود فریبی میں
ادھورے راستے تو ہیں ، سفر میں دائرے بھی ہیں
پرا نے زخم تو اب فارغ التّحصیل ٹھہرے ہیں
ابھی تعلیم جاری ہے’ نئے کچھ داخلے بھی ہیں
نہ ترچھے ہیں ، نہ ہی سیدھے ، نہ اسّی کے ، نہ نوّے کے
کہ مقیاس مَحبّت میں ‘ نئے کچھ زاویے بھی ہیں
ولی بھی اب ولی کب ہے۔۔۔ کراماتی ولایت میں
یہاں کرگس کے شاہیں سے’ انوکھے رابطے بھی ہیں
یہ اُس نے دل جلانے کو ‘ جو کچھ سامان بھیجا ہے
انھی چنگاریوں میں ســعدیـہؔ ! کچھ معجزے بھی ہیں
( ســـعدیــہؔ بشــــیـر )

جواب دیں
تبصرہ کرنے سے پہلے آپ کا لاگ ان ہونا ضروری ہے۔