( غیر مطبوعہ )
مُہر
گھاس کے فرش پہ جب آس کا بِستر رکّھا
اپنے زانو پہ رکّھی بیضوی چہرے کی حَسیں دست آویز
گال پر ہاتھ کا مِسطر رکّھا
تیری روشن جبیں پہ چَسپاں کی
یہ جو ہونٹوں کی دُہر ہے میری
تیرے ماتھے پہ مُہر ہے تیری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اپنی آنکھوں سے اُتارا ہے ترے مردُم میں
یہ جو تُو شِیش بھری آنکھوں سے پھنکارتی ہے
سنگ کر دیتی ہے’ جو دیکھتی ہے
چُور کر دیتی ہے’ جو مارتی ہے
تیری آنکھوں میں قہر ہے میرا
تیری نظروں میں زہر ہے میرا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ جو دن چڑھتے نکلتا ہے تِری ایڑھیوں سے
اور دھرتی کو حَسیں کرتا ہے
آسماں کرتا ہے نیلی چَھت کو
اور مٹّی کو زمیں کرتا ہے
تیرے سایے میں عکس ہے میرا
تیری جُنبِش میں رقص ہے میرا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اے مِرے غالیہ مُو !
اے مِرے قاقُم اَندام !
کیوں دھڑکتا ہے’ لرزتا ہے مِرے ہاتھوں سے؟؟
اے مِرے خوش پرواز !
ایک جَھٹکے سے ہتھیلی کا قفَس توڑ دیا
جا ۔۔۔ تجھے چھوڑ دیا
کھیت کَھلیان پہ اُڑ ۔۔۔ دشت پہ ‘ میدان پہ اُڑ
گاؤں کے گیان پہ اُڑ ۔۔۔۔ شہر کے زندان پہ اُڑ
دھیان کی راکھ پہ اُڑ ۔۔۔ سوچ کے شَمشان پہ اُڑ
مِہر کے نُور پہ اُڑ۔۔۔ ماہ کی قندیل پہ اُڑ
آسماں آسماں گَدرائے ہوئے نِیل پہ اُڑ
سات بَحروں کے دُھواؑں دیتے ہوئے گِیل پہ اُڑ
اِن پَروں میں چٹاخ ہے میری
سب درختوں میں شاخ ہے میری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مَیں پرندوں کو ہَوا دیتا ہُوں
کبھی پِنجریلے قفس میں نہیں رکھتا ان کو
ریشمی مُہر لگا دیتا ہُوں
اُڑا دیتا ہوں
( وحیدؔ اَحمد )
جواب دیں
تبصرہ کرنے سے پہلے آپ کا لاگ ان ہونا ضروری ہے۔