پیر • 5 اکتوبر 2026ء
📚 کتب خانہ ۱۴۸٬۸۹۴

غزل پلس(11)۔۔ڈاکٹر ستیہ پال آنند


چیز چمکیلی سی بیٹھی تھی مر ے پھن میں تنی
سنگ اسود کا کوئی ٹکڑا تھا یا پارس منی

کھٹکھٹائیں کس کا در اس شہر کے دریوزہ گر
گانٹھ کے پکے ہیں دونوں، شُوم کیا اور کیا غنی

tripako tours pakistan

اک زمرد اب اگلنا ہی پڑے گا وقت پر
بھول سے وہ کیوں نگل بیٹھی تھی ہیرے کی کنی

رات کس کے بخت جاگے تھے، بتا، اے نازنین
آنکھ بھی ہے سوئی سوئی، زلف بھی ہے ان منی

اک اٹھنی بھی نہیں، جیبیں الٹ کر دیکھ لیں
یوں تو اپنے رام ہیں ہر شام قسمت کے دھنی

اک نُچی سی فاختہ تھی صبح کو وہ فاحشہ
رات بیٹھی تھی وہ کوٹھے پر سجی ، سنوری، بنی

(ق)
گھر کی ہر اک اینٹ جیسے روکتی ہی رہ گئی
“جاؤ مت، اس وقت، دیکھو، رات ہے کتنی گھنی”
سنگدل تھا پر کپل وستو کا شہزادہ، جسے
روک کب سکتے تھے بچہ اور جیون سنگنی

ہر طرف ہے ہُو کا عالم، شہر سب چپ چاپ ہے
الاماں! کیسی ہے گورستان سی یہ سنسنی

پڑھنے والوں کا بھی سینہ چھید ڈالے گی غزل
لفظ ہر اک یوں تنا ہے جیسے نیزے کی اَنی!





بشکریہ