دیکھ کر ہر در و دیوار کو حیراں ہونا وہ مرا پہلے پ…
دیکھ کر ہر در و دیوار کو حیراں ہونا
وہ مرا پہلے پہل داخلِ زنداں ہونا
واہمہ مجھ کو دکھاتا ہے جنوں کے ساماں
نظر آتا ہے مجھے گھر کا بیاباں ہونا
حادثے دونوں یہ عالم میں اہم گزرے ہیں
میرا مرنا تری زلفوں کا پریشاں ہونا
رات بھر سوزِ محبت نے جلایا مجھ کو
تھا مقدر میں چراغِ شبِ ہجراں ہونا
جوش میں لے کے اک انگڑائی کسی کا کہنا
تم کو آتا ہی نہیں چاک گریباں ہونا
ان کی اس کوششِ بے حد کا پتہ دیتا ہے
چارہ سازوں کا مرے لاش پہ گریاں ہونا
سرخ ڈورے تری آنکھوں کے الٰہی توبہ
چاہیئے تھا انہیں پیوست رگِ جاں ہونا
ہو چلیں آپ کے بیمار کی آنکھیں بے نور
قہر تھا صبح کے تارے کا نمایاں ہونا
ان سے کرتا ہے دمِ نزع وصیت یہ عزیزؔ
خلق روئے گی مگر تم نہ پریشاں ہونا
(عزیز لکھنوی)
انتخاب :-: ابوالحسن علی ندوی