پیر • 5 اکتوبر 2026ء
📚 کتب خانہ ۱۴۸٬۸۹۴

حسرؔت موہانی​ ​. مجھ کو خبر نہیں کہ مِرا مرتبہ ہے کیا​ یہ تیرے اِلتفات نے آخر کِ…

حسرؔت موہانی​
​.
مجھ کو خبر نہیں کہ مِرا مرتبہ ہے کیا​
یہ تیرے اِلتفات نے آخر کِیا ہے کیا​
​
مِلتی کہاں گُداز طبیعت کی لذَّتیں ​
رنجِ فراقِ یار بھی راحت فزا ہے کیا​
​
حاضرہے جانِ زار، جو چاہو مجھے ہلاک​ !
معلوُم بھی تو ہو کہ تمہاری رضا ہے کیا​
​
ہُوں دردِ لادَوائے محّبت کا مُبتلا ​
مجھ کو خبر نہیں کہ دَوا کیا، دُعا ہے کیا​
​
میری خطا پہ آپ کو لازم نہیں نظر​
یہ دیکھئے مُناسبِ شانِ عَطا ہے کیا​
​
ہیں بہترین صُلح پہ ظاہر کی رنجشیں ​
ناحق ہُوں میں ملوُل، وہ مجھ سے خفا ہے کیا؟​
​
گروِیدہ جس سے تو ہے، خبر بھی نہیں اُسے​
پھر تیرے اِضطراب کی حسرؔت بِنا ہے کیا ​ ؟
​.
مولانا حسرؔت موہانی ​