جون کی جب اپنی بیوی زاہدہ سے طلاق ہوئی تو اس وقت جون ایلیا نے ایک نظم کہی تھی
.
جاؤ قرار بے دلاں ! شام بخیر شب بخیر
صحن ہوا دھواں دھواں ! شام بخیر شب بخیر
.
شام وصال ہے قریب ، صبح کمال ہے قریب
پھر نہ رہیں گے سر گراں ، شام بخیر شب بخیر
.
وجد کرے گی زندگی جسم بہ جسم ، جاں بہ جاں
جسم بہ جسم ، جاں بہ جاں ، شام بخیر شب بخیر
.
اے میرے شوق کی امنگ ، میرے شباب کی ترنگ
تجھ پہ شفق کا سائباں ، شام بخیر شب بخیر
.
تو میری شاعری میں ہے رنگ طراز و گل فشاں
تیری بہار بے خزاں ، شام بخیر شب بخیر
.
تیرا خیال خواب خلوت جاں کی آب و تاب
جسم جمیل و نوجواں ، شام بخیر شب بخیر
.
ہے میرا نام ارجمند ، تیرا حصار سر بلند
بانوئے شہر جسم و جاں شام بخیر شب بخیر
.
” دید سے جان دید تک ، دل سے رخ امید تک
کوئی نہیں ہے درمیاں شام بخیر شب بخیر”
.
ہوگئی دیر جاؤ تم ، مجھ کو گلے لگاؤ تم
تو میری جاں ہے میری جاں! شام بخیر شب بخیر
.
شام بخیر شب بخیر ، موج شمیم پیرہن
تیری مہک رہے گی یاں شام بخیر شب بخیر
.
جون ایلیاء

جواب دیں
تبصرہ کرنے سے پہلے آپ کا لاگ ان ہونا ضروری ہے۔