تم قتل کرو ہو کہ کرامات کرو ہو —– ڈاکٹر کلیم عاجز
میرے ہی لہو پر گزر اوقات کرو ہو
مجھ سے ہی امیروں کی طرح بات کرو ہو
دن ایک ستم، ایک ستم رات کرو ہو
وہ دوست ہو، دشمن کو بھی تم مات کرو ہو
ہم خاک نشیں، تم سخن آرائے سرِ بام
پاس آ کے ملو، دُور سے کیا بات کرو ہو
ہم کو جو ملا ہے وہ تمھیں سے تو ملا ہے
ہم اور بھُلا دیں تمھیں، کیا بات کرو ہو
یوں تو ہمیں منہ پھیر کے دیکھو بھی نہیں ہو
جب وقت پڑے ہے تو مدارات کرو ہو
دامن پہ کوئی چھینٹ نہ خنجر پہ کوئی داغ
تم قتل کرو ہو کہ کرامات کرو ہو
بکنے بھی دو عاجزؔ کو جو بولے ہے، بکے ہے
دیوانہ ہے، دیوانے سے کیا بات کرو ہو
(ڈاکٹر کلیم عاجز)
……
تم غیروں سے ہنس ہنس کے ملاقات کرو ہو —– اقبال عظیم
تم غیروں سے ہنس ہنس کے ملاقات کرو ہو
اور ہم سے وہی زہر بھری بات کرو ہو
بچ بچ کے گزر جاؤ ہو تم پاس سے میرے
تم تو بخدا غیروں کو بھی مات کرو ہو
نشتر سا اُتر جاوے ہے سینے میں ہمارے
جب ماتھے پہ بل ڈال کے تم بات کرو ہو
تقوے بھی بہک جاویں ہیں محفل میں تمہاری
تم اپنی ان آنکھوں سے کرامات کرو ہو
پھولوں کی مہک آوے ہے سانسوں میں تمہاری
موتی سے بکھر جاویں ہیں جب بات کرو ہو
ہم غیروں کے آگے تمہیں کیا حال بتائیں
پاس آکے سنو دور سے کیا بات کرو ہو
کیا کہہ کے پُکاریں گے تمہیں لوگ یہ سوچو
اقبال پہ تم ظلم تو دن رات کرو ہو

جواب دیں
تبصرہ کرنے سے پہلے آپ کا لاگ ان ہونا ضروری ہے۔