پیر • 5 اکتوبر 2026ء
📚 کتب خانہ ۱۴۸٬۸۹۴

بابِ حیرت سے مجھے اِذنِ سفر ہونے کو ہے تہنیت اے د…

بابِ حیرت سے مجھے اِذنِ سفر ہونے کو ہے
تہنیت اے دل، کہ اب دیوار در ہونے کو ہے

کھول دیں زنجیر در، حوض کو خالی کریں
زندگی کے باغ میں اب سہ پہر ہونے کو ہے

موت کی آہٹ سُنائی دے رہی ہے دل کو کیوں
کیا محبّت سے بہت خالی یہ گھر ہونے کو ہے

گردِ رہ بن کر کوئی حاصل سفر کا ہوگیا
خاک میں مِل کر کوئی لعل و گُہر ہونے کو ہے

اِک چمک سی تو نظر آئی ہے اپنی خاک میں !
مجھ پہ بھی، شاید توجّہ کی نظر ہونے کو ہے

گُمشدہ بستی مُسافر لوٹ کر آتے نہیں
معجزہ ایسا مگر، بارِ دِگر ہونے کو ہے

رونقِ بازارِ محفِل کم نہیں ہے آج بھی
سانحہ اِس شہر میں، کوئی مگر ہونے کو ہے

گھر کا سارا راستہ، اِس سرخوشی میں کٹ گیا !
اِس سے اگلے موڑ کوئی ہمسفر ہونے کو ہے

پروین شاکر ۔۔۔!!