ایک زمین غیر مردّف ہم قافیہ
حضرت علامّہ مُحمّد اِقبالؔؒ
حضرت واصِف علی واصِفؒؔ
۔۔۔۔۔
وہی میری کم نصیبی وہی تیری بے نیازی
میرے کام کُچھ نہ آیا یہ کمالِ نَے نوازی
مَیں کہاں ہُوں تُو کہاں ہے یہ مکاں کہ لامکاں ہے
یہ جہاں مِرا جہاں ہے کہ تِری کرشِمہ سازی
اِسی کشمکش میں گُزرِیں مِری زِندگی کی راتیں
کبھی سوز و سازِ رومیؒ کبھی پیچ و تابِ رازیؒ
وہ فریب خوردہ شاہیں کہ پلا ہو کرگسوں میں
اُسے کیا خبر کہ کیا ہے رہ و رسمِ شاہبازی
نہ زباں کوئی غزل کی نہ زباں سے باخبر مَیں
کوئی دِلکشا صدا ہو عجمی ہو یا کہ تازی
نہیں فقر و سلطنت میں کوئی اِمتِیاز ایسا
یہ سِپَہ کی تیغ بازی وہ نِگہ کی تیغ بازی
کوئی کارواں سے ٹُوٹا کوئی بدگُماں حرم سے
کہ امیرِ کارواں میں نہیں خُوئے دِل نوازی۔۔۔!
۔۔۔۔۔
تِری شان بُوترابیؓ مِرا شوق خاک بازی
تِرے آستاں پہ لاۓ مُجھے تِری دِل نوازی
مَیں نِکل گیا خِرَد سے مَیں جُنُونِ باخبر ہُوں
میری زد میں لامکاں ہے میرا کام شاہبازی
تُو ہے ساقیِ زمانہ مَیں رِندِ جاودانہ
ہو عطا مئے شبانہ کہ جُھکے تِرا نمازی
تِرے نقشِ پا کا سجدہ میری بندگی کا حاصِل
اِسی بندگی سے رُومیؒ اِسی بندگی سے رازیؒ
تیری یاد کا ولی ہُوں کہ مَیں واصِفؔؒ علی ہُوں
نہ خفی ہُوں نَے جلی ہُوں مَیں ہُوں حرفِ بے نیازی۔۔۔!
جواب دیں
تبصرہ کرنے سے پہلے آپ کا لاگ ان ہونا ضروری ہے۔