ایک زمین
مُحسِن نَقوِی
ماجِدؔ صِدیقی
۔۔۔۔۔
مُحسِنؔ نَقوِی
گِلہ نہیں کوﺉ تُجھ سے جو تُو دِکھاﺉ نہ دے
وہ تِیرگی ہے کہ کُچھ بھی مُجھے سُجاﺉ نہ دے
بُھلا دے اے مِرے گھر کی اُداس رات مُجھے
کہ وَحشَتِ سرِ صحرا مُجھے رہاﺉ نہ دے
تِرےوِصال کی صُبحوں کا رنگ کیا ہوگا ؟
یہ سوچنے کی فَراغَت شبِ جُداﺉ نہ دے
تِرا وُجُود اگر ہے تو اب نقاب اُٹھا
مَیں تھک گیا ہُوں مُجھے زخمِ نارساﺉ نہ دے
مَیں جُھوٹ بول رہا ہُوں کہ مُعتَبَر ٹھہرُوں
جوسچ کہُوں تو زمانہ مِری صفاﺉ نہ دے
رگوں سے خُون جو پُھوٹے تو کوﺉ خط لِکھوں
کہ میری آنکھ تو لِکھنے کو روشناﺉ نہ دے
مِری زباں پہ تِری مَصلَحَت کے پہرے ہیں
مِرے خُدا مُجھے اِلزامِ بے نَواﺉ نہ دے
کوﺉ بھی دُشمنِ جاں ہو مُجھے قُبُول مگر
مَیں اپنے مِصر کا یُوسُف ہُوں مُجھ کو بھاﺉ نہ دے
سُکُوتِ دَشت کی ہیبَت ہے یا خموشیِ مرگ
خود اپنی چِیخ بھی محسنؔ سُناﺉ نہ دے
۔۔۔۔۔
ماجِدؔ صِدیقی
اسِیرِ قُرب کرے وُسعَتِ خُُدائی نہ دے
یہی جُنُوں ہے مِرا وہ مُجھے رہائی نہ دے
وہ مِثلِ مَوج مِلے آکے ریگِ ساحِل سے
مگر اُسے بھی کبھی اِذنِ آشنائی نہ دے
یہ عہدِ جیب تراشی ہے کیا کہ جِس میں کہِیں
کوئی بھی کُھل کے کِسی اور کی صفائی نہ دے
یہی دُعا ہے کہ بے آب ہوں نہ حرف مِرے
سزا کوئی بھی وہ دے عِجزِ بے نَوائی نہ دے
امیرِ شہر کا کیا وہ تو بس یہی چاہے
یہاں کوئی بھی کِسی بات کی دُہائی نہ دے
یہ کیسا منبعِ ظُلمت ہے دَورِ نَو کہ جہاں
جُز اپنی ذات کے ماجدؔ کوئی دِکھائی نہ دے۔۔۔!
جواب دیں
تبصرہ کرنے سے پہلے آپ کا لاگ ان ہونا ضروری ہے۔