ایک زمین
مرزا اسد اللہ خان غالبؔ
تلوک چند محرومؔ
۔۔۔۔۔
غالبؔ
شُمارِ سُبَحہ مرغُوبِ بُتِ مُشکِل پسند آیا
تماشائے بہ یک کفِ بُردنِ صد دِل پسند آیا
بہ فیضِ بے دِلی نَومیدیٔ جاوید آساں ہے
کشائش کو ہمارا عُقدۂ مُشکِل پسند آیا
ہَوائے سیرِ گُل آئینۂ بے مِہریِ قاتِل
کہ اندازِ بَخُوں غلطِیدنِ بِسمِل پسند آیا
ہُوئی جِس کو بہارِ فُرصتِ ہستی سے آگاہی
برنگِ لالہ جامِ بادہ بر محمل پسند آیا
سوادِ چشمِ بِسمِل اِنتِخابِ نُقطہ آرائی
خِرامِ ناز بے پروائیِ قاتِل پسند آیا
روانی ہائے موجِ خُونِ بِسمِل سے ٹپکتا ہے
کہ لُطفِ بے تحاشا رفتنِ قاتِل پسند آیا
اسدؔ ہر جا سُخن نے طرحِ باغِ تازہ ڈالی ہے
مجھے رنگِ بہار ایجادیِ بیدلؔ پسند آیا۔۔۔!
۔۔۔۔۔
محرومؔ
زہے قِسمت اگر تُم کو ہمارا دِل پسند آیا
مگر یہ داغ کیوں کر اے مہِ کامِل پسند آیا
کِیا ہے قتل لیکن دیکھیے جاں کب نِکلتی ہے
کہ اُن کو رقص بیتابانۂ بِسمِل پسند آیا
وہ مومن بھی ہے مانگے گا دُعا صِدقِ تناسُخ کی
تِرے ہاتھوں سے مرنا جِس کو اے قاتِل پسند آیا
نہ پُوچھو کب سے مَیں شامِل ہُوا ہُوں تِیرہ بختوں میں
کِسی کے عارِضِ روشن کا جب سے تِل پسند آیا
یہ گُستاخی ہے اے محرومؔ اپنی حد سے بڑھتا ہے
کہ تا حدِ زمین غالبؔ مُشکِل پسند آیا۔۔۔!
جواب دیں
تبصرہ کرنے سے پہلے آپ کا لاگ ان ہونا ضروری ہے۔