ایک زمین حکیم مومن خان مومنؔ فراقؔ گورکھپوری ۔۔۔۔۔…
ایک زمین
حکیم مومن خان مومنؔ
فراقؔ گورکھپوری
۔۔۔۔۔
مومنؔ
جُوں نَکہَتِ گُل جُنبِش ہے جی کا نِکل جانا
اے بادِ صبا میری کروَٹ تو بدل جانا
پالَغزِ محبّت سے مُشکِل ہے سنبَھل جانا
اُس رُخ کی صفائی پر اِس دِل کا پِھسَل جانا
سِینہ میں جو دِل تڑپا دھر ہی تو دِیا دیکھا
پِھر بُھول گیا کیسا مَیں ہاتھ کا پَھل جانا
اِتنا تو نہ گھبراؤ راحت یہِیں فرماؤ
گھر میں مِرے رہ جاؤ آج اور بھی کَل جانا
اے دِل وہ جو یاں آیا کیا کیا ہمیں ترسایا
تُو نے کہِیں سِکھلایا قابُو سے نِکل جانا
کیا ایسے سے دعویٰ ہو مَحشَر میں کہ مَیں نے تو
نظارہِ قاتِل کو اِحسانِ اَجل جانا
ہے ظُلم کرم جِتنا تھا فرق پڑا کِتنا
مُشکِل ہے مِزاج اِتنا اِک بار بدل جانا
حُوروں کی ثنا خوانی واعِظ یُوں ہی کب مانی
لے آ کہ ہے نادانی باتوں میں بہل جانا
عِشق اُنکی بَلا جانے عاشِق ہوں تو پہچانے
لو مُجھ کو اَطّبِا نے سَودے کا خلَل جانا
کیا باتیں بناتا ہے وہ جان جلاتا ہے
پانی میں دِکھاتا ہے کافُور کا جل جانا
مَطلَب ہے کہ وَصلَت میں ہے بُوالہَوَس آفت میں
اِس گرمیِ صُحبَت میں اے دِل نہ پِگھل جانا
دَم لینے کی طاقت ہے بیمارِ محبت ہے
اِتنا بھی غنِیمَت ہے مومنؔ کا سنبھل جانا۔۔۔!
۔۔۔۔۔
فراقؔ
مَیں ہوشِ عَنادِل ہُوں مُشکِل ہے سَنبَھل جانا
”اے بادِ صبا میری کروَٹ تو بدل جانا“
تقدیرِ محبّت ہُوں مُشکِل ہے بدل جانا
سو بار سنبھل کر بھی معلُوم سنبھل جانا
اُس آنکھ کی مَستی ہُوں اے بادہ کشو جِس کا
اُٹھ کر سرِ میخانہ مُمکِن ہے بدل جانا
ایّامِ بہاراں میں دِیوانوں کے تیور بھی
جِس سَمت نَظَر اُٹھی عالَم کا بدل جانا
گھنگھور گھٹاؤں میں سرشار فضاؤں میں
مَخمُور ہَواؤں میں مُشکِل ہے سنبھل جانا
ہُوں لغزِشِ مَستانہ میخانہءِ عالَم میں
برقِ نِگہءِ ساقی کُچھ کُچھ بَچ کے نِکل جانا
اِس گُلشنِ ہَستی میں کم کِھلتے ہیں گُل ایسے
دُنیا مَہک اُٹھے گی تُم دِل کو مَسَل جانا
مَیں سازِ حقیقت میں سویا ہُوا نَغمَہ ہُوں
تھا رازِ نِہاں کوئ پردوں سے نِکل جانا
ہُوں نَکہَتِ مستانہ گُلزارِ محبّت میں
مدہوشیِ عالَم ہے پہلُو کا بدل جانا
مَستی میں لگاوَٹ سے اُس آنکھ کا یہ کہنا
میخوار نِیَت ہُوں مُمکِن ہے بدل جانا
جو طرزِ غزل گوئ مومنؔ نے طرح کی تھی
صد حیف فِراقؔ اُس کا صد حیف بدل جانا۔۔۔!