پیر • 5 اکتوبر 2026ء
📚 کتب خانہ ۱۴۸٬۸۹۴

اعزاز احمد آزر فرض کرو تم چھت پر بیٹھی اپنے بال سک…

اعزاز احمد آزر
فرض کرو تم چھت پر بیٹھی اپنے بال سکھاتی ہو
فرض کرو کے دھوپ کا اس دن کچھ کچھ رنگ گلابی ہو
فرض کرو تم بیٹھے بیٹھے گہری سوچ میں کھو جاؤ
بال سکھانا چھوڑ کے سر گھٹنوں پہ رکھ کر سو جاؤ
فرض کرو اس نیند میں تم نے دیکھا ایسا سپنا ہو
بے کل ہو کر مین یہ چاہے کاش یہ سپنا اپنا ہو
فرض کرو تم خط لکھنے کو کاغذ قلم اُٹھاتی ہو
خط لکھنے سے پہلے کاغذ کو خوشبو خوب لگاتی ہو
فرض کرو القاب پہ آ کر قلم تمہارا رک جائے
نظر تمہاری دھک دھک کرتے دل کی جانب جھک جائے
فرض کرو ایک نام لکھو اور لکھ کر کاٹو پھر لکھو
فرض کرو سپنے افسانے خط کا نام محبت ہو
فرض کرو ہم دونوں کے دل ایک ہی ساتھ دھڑکاتے ہوں
فرض کرو یہ ساری باتیں فرض نا کرنی پڑتی ہوں . . . !
فرض کرو پر کیوں تم آخر فرض کرو۔۔۔۔۔۔۔۔۔۔۔
….
تم ایسا کرنا کہ کوئی جگنو کوئی ستارہ سنبھال رکھنا
مرے اندھیروں کی فکر چھوڑو بس اپنے گھر کا خیال رکھنا

اجاڑ موسم میں ریت دھرتی پہ فصل بوئی تھی چاندنی کی
اب اس میں اگنے لگے اندھیرے تو کیسا جی میں ملال رکھنا

دیار الفت میں اجنبی کو سفر ہے در پیش ظلمتوں کا
کہیں وہ راہوں میں کھو نہ جائے ذرا دریچہ اجال رکھنا

بچھڑنے والے نے وقت رخصت کچھ اس نظر سے پلٹ کے دیکھا
کہ جیسے وہ بھی یہ کہہ رہا ہو تم اپنے گھر کا خیال رکھنا

یہ دھوپ چھاؤں کا کھیل ہے یا خزاں بہاروں کی گھات میں ہے
نصیب صبح عروج ہو تو نظر میں شام زوال رکھنا

کسے خبر ہے کہ کب یہ موسم اڑا کے رکھ دے گا خاک آذرؔ
تم احتیاطاً زمیں کے سر پر فلک کی چادر ہی ڈال رکھنا
…..
درخت جاں پر عذاب رت تھی نہ برگ جاگے نہ پھول آئے
بہار وادی سے جتنے پنچھی ادھر کو آئے ملول آئے

نشاط منزل نہیں تو ان کو کوئی سا اجر سفر ہی دے دو
وہ رہ نورد رہ جنوں جو پہن کے راہوں کی دھول آئے

وہ ساری خوشیاں جو اس نے چاہیں اٹھا کے جھولی میں اپنی رکھ لیں
ہمارے حصے میں عذر آئے جواز آئے اصول آئے

اب ایسے قصے سے فائدہ کیا کہ کون کتنا وفا نگر تھا
جب اس کی محفل سے آ گئے اور ساری باتیں ہی بھول آئے

وفا کی نگری لٹی تو اس کے اثاثوں کا بھی حساب ٹھہرا
کسی کے حصے میں زخم آئے کسی کے حصے میں پھول آئے

بنام فصل بہار آذرؔ وہ زرد پتے ہی معتبر تھے
جو ہنس کے رزق خزاں ہوئے ہیں جو سبز شاخوں پہ جھول آئے


Comments

One response to “اعزاز احمد آزر فرض کرو تم چھت پر بیٹھی اپنے بال سک…”

جواب دیں