اخترؔ شیرانی تمنّاؤں کو زِندہ، آرزوؤں کو جَواں ک…
اخترؔ شیرانی
تمنّاؤں کو زِندہ، آرزوؤں کو جَواں کر لُوں
یہ شرمِیلی نظر کہہ دے، تو کُچھ گُستاخِیاں کر لُوں
بہار آئی ہے بُلبُل دردِ دِل کہتی ہے پُھولوں سے
کہو تو، مَیں بھی اپنا دردِ دِل تُم سے بَیاں کر لُوں
ہَزاروں شَوخ ارماں لے رہے ہیں چُٹکیاں دِل میں
حَیا اُن کی اِجازت دے تو کُچھ بیباکیاں کر لُوں
کوئی صُورت تو ہو دُنیائے فانی میں بہلنے کی
ٹھہر جا اے جَوانی! ماتَمِ عُمرِ رَواں کر لُوں
چَمن میں ہیں بَہم پروانہ و شمع و گل و بُلبُل
اِجازت ہو تو، مَیں بھی حالِ دِل اپنا بَیاں کر لُوں
کِسے معلُوم کب کِس وقت کِس پر گِر پَڑے بِجلی
ابھی سے مَیں چَمن میں چَل کر آباد آشیاں کر لُوں
مجھے دونوں جہاں میں ایک وہ مِل جائیں گر، اخترؔ !
تو اپنی حسرتوں کو، بے نیازِ دو جہاں کر لُوں
اخترؔ شیرانی