پیر • 5 اکتوبر 2026ء
📚 کتب خانہ ۱۴۸٬۸۹۴

اقرار میں کہاں ہے انکار کی سی خوبی​ ہوتا ہے شوق غا…

اقرار میں کہاں ہے انکار کی سی خوبی​
ہوتا ہے شوق غالب اس کی نہیں نہیں پر​
​(مکمل غزل)

باندھے کمر سحر گہ آیا ہے میرے کیں پر​
جو حادثہ فلک سے نازل ہوا زمیں پر​
​
اقرار میں کہاں ہے انکار کی سی خوبی​
ہوتا ہے شوق غالب اس کی نہیں نہیں پر​
​
کنجِ قفس میں جوں توں کاٹیں گے ہم اسیراں​
سیرِ چمن کے شایاں اپنے رہے نہیں پر​
​
جوں آب گیری کردہ شمشیر کی جراحت​
ہے ہر خراشِ ناخن رخسارہ و جبیں پر​
​
آخر کو ہے خدا بھی تو اے میاں جہاں میں​
بندے کے کام کچھ کیا موقوف ہیں تمھیں پر​
​
غصے میں عالم اس کا کیا کیا نظر پڑا ہے​
تلوار کھینچنا تھی اس کی جبیں کی چیں پر​
​
تھے چشمِ خوں فشاں پر شاید کہ دست و دامن​
ہیں میرؔ داغ خوں کے پیراہن آستیں پر​

(میر تقی میرؔ​)