بدلے گی کائنات مری بات مان لو
مجھ سے ملاؤ ہات مری بات مان لو
ہم سے قدم ملا کے چلو گے تو دیکھنا
سر ہوں گے شش جہات مری بات مان لو
بگڑی ہوئی جو بات بڑی مدتوں سے ہے
بن جائے گی وہ بات مری بات مان لو
ہے زندگی بغیر تمہارے اک اضطراب
دے دو اسے ثبات مری بات مان لو
کس نے کہا ہے تم سے کہ تا عمر ساتھ دو
ہے چار دن کی بات مری بات مان لو
پینا پڑے کہیں نہ تمہیں بھی مری طرح
تلخابۂ حیات مری بات مان لو
میں جانتا ہوں میری طرح چاہتی ہو تم
تنہائی سے نجات مری بات مان لو
(جمیل عثمان)
المرسل :-: ابوالحسن علی ندوی
