( غیــر مطبــوعــہ )
یہ آخــــــری چــراغ ہَوا میں اُچھال دوں
ممکن ہے’ آج دل سے تجھے بھی نکال دوں
سوچا ہے کتنی بار ۔۔۔ اُلٹ دوں یہ کائنات
اِس کو نئے سِرے سے’ نئے خدّ و خال دوں
تُو جو سُجھا رہا ہے یہ آسانیاں مجھے
ایسا نہ ہو کہ میں تجھے مشکِل میں ڈال دوں
اِتنے بھی بادشاہ نہيں ہو کہ میں تمھیں
دریا سے دشت ‘ دشت سے دریا نکال دوں
اُس کے بغیر بھی تو دھڑکتا ہے دل مِرا
اِس بے دِلی کو اور میں کتنا کمال دوں
دامن پہ سِلوٹیں ہیں مِرے ‘ داغ تو نہيں
اِس شہر کو میں کس لیے اپنی مثال دوں
جب چاہ کر بھی عشق نہيں ہو رہا مجھے
پھر کیا پُرانے شعر کو تازہ خیال دوں
مدّت کے بعد آیا ہُوں عــامـیؔ ! کنارے پر
جی چاہتا ہے’ نیکیاں دریا میں ڈال دوں
( عِمـــران عــامـیؔ )
