نیــا جــنم
سوال لمحے کی قیــد میں ہے
ہزار نُوری برس کی دُوری کسی کی چشــم ِ مغائرت ہے
کہیں پہ مقسُــوم کہکشــاں کو اماوَســوں کی نظر لگی ہے
کہیں جہــانوں کی آفـــرینش پنہ گُزینوں کی واپَسی ہے
ہر ایک کتبے پہ نقش ہے ‘
یہ جواز ِ ہستی بھی واہَمہ ہے
خُــدا کی پہلی عطــا مَحبّت ۔۔۔ متاع ِ قُدسی ہے اصل ِ آدم
یہ عشق پَے ہم ہر اک صحــیفے کا ما حَصَــل ہے
مَحبّـتوں میں مســافتوں میں فلک کی دُوری بھی دو قدم ہے
یہ لفظ و معنی کی ســرد جنگیں ‘ قلُوب ِ اطہَـر پہ سنگ باری
انا گزیدہ شکست و نُصرت ‘ زوال ِ عقل و خِــرَد ہے
یعنی
بَہ جُز ندامت کے کچھ نہیں ہے
نئی مَحبّت کے منتظِــر کی اســیر ســوچیں
ہمیشــگی کا قفس نہیں ہے
سَـمَے کا ساگر ازل کے دن سے بِپھر رہا ہے
ہر ایک لمحہ نئے خیالوں کا اک جہاں ہے
نئے زمانوں کی روشنی ہے
نیا سفر ہے
( عتیــق الرّحــمٰن خواجـــہؔ )
