( غیــر مطبــوعــہ )
خاموش صـداؤں سے’ نہ پیغــام سے آیا
وہ حُســن ۔۔۔۔ مِرے پاس کسـی کام سے آیا
آیا تو نظر آیا مجھے خـــارِ ضـرُورت
ہائے ۔۔۔۔ وہ گلِ خـاص’ رہِ عام سے آیا
جب رات ڈھلی ‘ یاد جِـگر چیــر کے گذری
ویسے تو خیال اُس کا مجھے شــام سے آیا
آنچل سے اُبھر آئے ہیں جوبن کے خَم و پیـچ
اِس شِــعر میں اِبلاغ بھی اِبہــام سے آیا
یہ پھول ۔۔۔۔ مِرے قُرب کے موسِــم نے کِھلائے
یہ رنگـــــ ترے رخ پہ مِرے نام سے آیا
تکتا ہوں امارت کی فلک بُوس عمارت
اَفلاس مِرے گھر میں اِسی بام سے آیا
شُـہرت جو مِلی تجھ کو’ بُرے کام نے دی ہے
جو نام ترے پاس ہے’ دُشــنام سے آیا
کھٹکے سے کھٹک جائے نہ دل دار’ سو نیّـــرؔ !
آرام گـہِ حُسـن میں ۔۔۔ آرام سے آیا
( شـــہزاد نیّــرؔ )
