ایک زمین
شاہ محمد تقیؒ المتخلص بہ رازؔ
اخترعلی المتخلص بہ ساغرؔصدیقی
۔۔۔۔۔
جنابِ رازؔ
آپ خود سُنتے تَو سُنتے اَپنے دِیوانے کی بات
بَندَہ پَروَر ہے یہ کِس کے پاس لے جانے کی بات
اللہ اللہ مُجھ سے رِندِ بادَہ کَش کو دیکھ کر
مَیکدے میں ہوگئی شِیشے سے پیمانے کی بات
بَزم میں خود جَل رہی تھی سَوزِ دَردِ عِشق سے
شمعِ بیکَس کِس طَرح سُنتی بھی پَروانے کی بات
خُشک دامانی سے دُنیا ہورہی تھی بَدگُماں
شُکر ہے اَشکوں نے رَکھ لی میرے غَم خانے کی بات
وہ کِسی کی کیوں سُنے اَور وہ کِسی سے کیوں کہے
تُجھ سے ہوتی ہے ہَمیشہ تیرے دِیوانے کی بات
اِس جگہ سے دوسری جانِب چلا جاتا ہُوں مَیں
جَب کَہِیں ہوتی ہے کوئ دِل کے بہلانے کی بات
راز یہ وہ ہے کہ دُنیا سے چُھپانا چاہیئے
رازؔ کعبہ میں کہیں گے چَل کے بُتخانے کی بات۔۔۔!
۔۔۔۔۔
جنابِ ساغرؔ
اِس میں شامِل دَشت و صحرا اَور وِیرانے کی بات
اَہلِ مَحفِل سے جُدا ہے تیرے دیوانے کی بات
مُحتَسِب ہَم بےگُناہوں کو نہ دے اِلزامِ مَے
تَشنَگی میں آگئی ہونٹوں پہ مَے خانے کی بات
ہاں اَبھی بُھولی نہیں جَورِ خِزاں کی داستان
اَحتِیاطاً ہَم نہیں کَرتے بہار آنے کی بات
بن گئی ہے سُرخی حُسنِ بہارِ جاوِداں
آگئی زُلفِ مُعَنبَر کے بِکھر جانے کی بات
ہر نَفَس میں شُعلہ زن ہیں گَرمِیاں حالات کی
زِندَگی ہے اِن دِنوں بے مَوت مَرجانے کی بات
مَیکدَہ بَدلا ہُوا ساغرؔ شِکَستِ حال ہیں
ہر حَقِیقَت بن گئی ہے آج اَفسانے کی بات۔۔۔!
