ایک زمین
حمایت علی شاعرؔ
سید مبارک شاہ
۔۔۔۔۔
حمایت علی شاعرؔ
یہ شہرِ رَفِیقاں ہے دِلِ زار سَنبَھل کے
مِلتے ہیں یہاں لوگ بہت رُوپ بدَل کے
عارِض ہیں کہ مُرجھائے ہُوئے پُھول کنوَل کے
آنکھیں ہیں کہ جُھلسے ہُوئے خوابوں کے مَحَل کے
چہرہ ہے کہ ہے آئینہِ گردِش دَوراں
شہکار ہیں کیا کیا مِرے نقّاشِ اَزل کے
فرہاد سرِ دار ہے شیریں سرِ بازار
بدلے نہیں اب تک مگر انداز غَزَل کے
آئے ہیں غمِ عِشق میں ایسے بھی مقامات
دِل خُون ہُوا آنکھ سے آنسُو بھی نہ ڈَھلکے
دُنیا بھی اِک آماجگہِ حُسن ہے شاعرؔ
دیکھو تو ذرا حُجلہِ جاناں سے نِکل کے۔۔۔!
۔۔۔۔۔
سیّد مبارک شاہ
ڈھل جائیں گے اَلفاظ سبھی لَوحِ اَزل کے
روۓ گا خُدا قالَبِ اِنسان ڈھل کے
درپیش مُجھے تیرے سمَندَد کا سَفَر ہے
اُترا تھا مَیں پَربَت سے کبھی تیرے پِگھل کے
نِکلُوں بھی جو گُزرے ہُوۓ لَمحات کی زَد سے
ڈر مُجھ سے لِپَٹ جاتے ہیں آتے ہُۓ کَل کے
کیوں اِتنی بلندی پہ سَنبھَل کر نہیں چَلتے
اِفلاک پہ گِر جاؤ گے دَھرتی سے پِھسل کے
ہم اہلِ زمیں کو جو نَظَر آتے ہیں تارے
قَرَنوں سے ہُوۓ راکھ کِسی آگ میں جَل کے
اَصنافِ سُخن اور بھی موجُود ہیں لیکِن
بَس تُجھ سے تَکَلُّم ہے تَو لَہجے میں غَزَل کے
آدم کے کِسی رُوپ کی تحقِیر نہ کر
پِھرتا ہے زمانے میں خُدا بھیس بدَل کے۔۔۔!
جواب دیں
تبصرہ کرنے سے پہلے آپ کا لاگ ان ہونا ضروری ہے۔