‘ صلح کی رات ”
نہ جانے رات کو تھا کون زینتِ پہلو؟
مچل رہی تھی ہوا میں شراب کی خوشبُو
حریمِ صلح میں قائم تھا، ایک مرکز پر
مزاجِ عشق و تقاضائے حُسنِ عربَدہ جُو
وفا کی انجمنِ ناز میں تھی شِیر و شکر
جراحتِ دلِ صد چاک و تیغِ صاعقہ خُو
مٹا چکا تھا فلک فرقِ ساغر و سنداں
بُھلا چکا تھا زمانہ نزاعِ سنگ و سبُو
ہوا کی جیب میں تھا تِیرِ از کماں رفتہ
کشش کے دام میں تھی کاوشِ رَمِ آہو
بساطِ عیش پہ خوابیدہ تھا غمِ دوراں
شرابِ ناب کی موجوں میں غرق تھے آنسُو
اُدھر محیطِ فلک پر فسُونِ نجم و قمر
اِدھر حریمِ تمنّا میں نرگسِ جادُو
اُدھر اُڑا ہوا طُولِ شبِ فراق کا رنگ
اِدھر شباب پہ آرائشِ خَمِ گیسُو
چِھڑی ہوئی ہے حکایت شبِ تمنّا کی
تڑپ کے جوشؔ پھر اک بار "نعرہؑ یاھُو”
(جوشؔ ملیح آبادی)
المرسل :-: ابوالحسن علی ندوی(بھٹکلی)
